Тываның Баштыңы Владислав Ховалыг «Росатом Энергосбыт» акционерлиг ниитилелдиң удуртулгазы-биле ажылчын ужуражылганы эрттирген. Ийи тала кады ажылдаарының аргаларын сайгарган. Компанияның удуртукчузу Алексей Горчаковтуң дыңнатканы-биле алырга, амгы үеде чугула санал-оналдарны ажылдап кылыры-биле информацияны чыып турар.
«Росатом Энергосбыт» акционерлиг ниитилел – «Росатом» күрүне корпорациязының тургузуунче кирип турар энергетика садар компания болур. Ол Россияның беш регионунда электри энергиязының магадылалдыг хандырылгазы-биле ажылдап турар. Компанияның төп офизи Москвада, салбырлары болгаш аңгы салбырлары Курск, Мурманск, Смоленск, Тверь областарда болгаш Хакас Республикада ажылдап турар. Компания 64 муң ажыг юридиктиг черже база дөрт сая ажыг чурттакчыже электри энергиязын хандырган.
«Росатом» күрүне корпорациязы-биле кады ажылдажылганы ам-даа хөгжүдер бис. Апрельде Кызылга эчис сорулгалыг сессияны кады эрттирдивис, ооң түңнелинде бизнестиң чаа угланыышкыннарын тургузарынче, инфратургузугну хөгжүдеринче, амыдыралдың шынарын бедидеринче болгаш регионнуң социал-экономиктиг хөгжүлдезинче угланган орук картазын ажылдап кылган бис» – деп, Владислав Ховалыг чугаалаан.
Санкт-Петербургтуң делегей чергелиг экономиктиг шуулганының үезинде, Тываның Баштыңы-биле «Росатомнуң» чиңгине директорунуң бирги оралакчызы – хөгжүлде болгаш делегей чергелиг бизнес адырының директору Кирилл Комаров ужурашкаш, эчис сорулгалыг кады ажылдажылганың орук картазын бадылаанын сагындыраал.
«Росатом» бүдүрүлгелериниң киржилгези-биле бизнестиң чаа угланыышкыннарының арга-шинээн ханы үнелээн болгаш келир үеде кады ажылдажылга дугуржулгазының үндезини болур документ элээн каш угланыышкыннарны, ооң иштинде кадык камгалалын, чурагайжыдылганы болгаш немелде технологияларны хаара туткан.
Планнаттынган хемчеглерниң күүселдези «Росатомнуң» тускай структураларының биле регионалдыг эрге-чагырга органнарының аразында сырый ажылдажылганы, күүселдениң базымынче угланган саналдарны болгаш коммерциялыг санаашкыннарны баш бурунгаар ажылдап кылырын негеп турар.
