Тываның Баштыңы Владислав Ховалыг Россияның Айыыл чок чорук албанының Тывада эргелелиниң удуртукчузунда чаа томуйлаткан Максим Бережок-биле ужурашкан.
Россияның Айыыл чок чорук албанының директорунуң дужаалы-биле ол албан-дужаалда Максим Бережокту томуйлаан, Тываның Баштыңынга болгаш территориалдыг айыыл чок органының хууда составынга таныштырган.
– Максим Викторович 1994 чылдан бээр айыыл чок чорук органнарында ажылдап турар. Ажылында улуг арга-дуржулгалыг. Тывага томуйладыр мурнунда, Россияның федералдыг айыыл чок чорук албанының төп аппарадынга ажылдап турган – деп, Владислав Ховалыг федералдыг албан чериниң чаа удуртукчузу-биле ужурашкан соонда, бодунуң блогунда бижээн.
Россияның Президентизиниң Чарлыы-биле, Россияның Айыыл чок чорук албанының Тыва Республикада эргелелин 2021 чылдан тура удуртуп турган Владлен Мельниковту чурттуң өске регионунда улуг шериг албан-дужаалче шилчиткени билдинген.
Тываның Баштыңы Владлен Мельниковка билчилгелиг кады ажылдажылгазы болгаш республикага кем-херек үүлгедиишкиннерин чавырылдырарынга албан черлер аразының демниг хөделиишкининге үлүг-хуузун кииргени дээш, четтиргенин илереткен.
