Тываның Баштыңы Владислав Ховалыг Россияның чиңгине прокуратуразының федералдыг хоойлужудулга күүселдезин хайгаараар кол эргелелдиң килдис начальниги Владислав Кучкин база Тыва Республиканың прокурору Евгений Ботвинкин-биле ажылчын ужуражылганы эрттирген. 2026 чылдың бирги чартыында регион чазааның болгаш прокуратура органнарның кады ажылының түңнелдери база хамаатыларның эргелерин камгалаар талазы-биле кады ажылдажылганы моон соңгаар быжыглаарының айтырыглары чугааның кол темалары болган.
«Чиңгине прокуратура-биле дорт харылзаа, арга-дуржулга солчулгазы, байдалды кады сайгарары биске амгы айтырыгларны оон-даа дүрген шиитпирлээринге дузалап турар. Чүгле регион чазаа биле федералдыг хайгаарал органнарының сырый кады ажылдажылгазы-биле Тываның чурттакчыларынга бүзүрелдиг болгаш айыыл чок эрге-хоойлу байдалын хандырар бис» – деп, Владислав Ховалыг демдеглээн.
Ужуражылганың киржикчилери хамаатыларның эрге-ажыын болгаш хоойлу езугаар сонуургалдарын камгалаарынче, ол ышкаш нарын айтырыгларны шиитпирлээрде күрүне эрге-чагырга органнарының болгаш прокуратураның аразында кады ажылдажылганың үре-түңнелин бедидеринче кичээнгейни угландырган. Олар регионда хоойлужудулга хажыдыышкыннарын үе шаанда илередип, чайладырынче, эрге-хоойлу практиказын сайзыраңгайжыдарынче, хоойлу-дүрүмнү быжыглаарынче угланган арга-хевирлерни сайгарган.
Амгы үеде чурттуң чиңгине прокуратуразындан Владислав Кучкин баштаан комиссия республиканың прокуратуразынга методиктиг болгаш практиктиг дузаны көргүзери-биле Тывада ажылдап турар.
Ужуражылганың түңнелинде, Тываның Чазаа биле прокуратура органнарының аразында кады ажылдажылганы хөгжүдер талазы-биле моон соңгааргы базымнарны тодараткан. Оларны боттандырары кады ажылдың дээштиин бедидер болгаш регион чурттакчыларынга эрге-хоойлу талазы-биле бүзүрелдиг камгалалды хандырар.
