Тываның Баштыңы Владислав Ховалыг Москвага ажыл албан аайы-биле чорааш, Россия Федерациязының камгалал сайыдының оралакчызы – Россияның Чепсектиг Күштериниң Кол шериг-политиктиг эргелелиниң начальниги, армияның генералы Виктор Горемыкин-биле ужурашкан.
55-ки аңгы гвардейжи мото-адыгжы (дагжы) бригаданың шериг албанныгларын Россия Федерациязының күрүне шаңналдары-биле шаңнаарының дугайында айтырыг – кол тема болган. Бригада бо чылдың ноябрь 1-де 10 чылдаанын демдеглээр.
«Тускай шериг операциязының эгезинден тура-ла, бригаданың дайынчылары эрес-дидим чоруктуң болгаш Төрээн чуртунга бердингениниң үлегер-чижээн көргүзүп, удурланыкчыларның-даа, бистиң чурттуң хамаатыларының-даа хүндүткелин болгаш үнелелин чаалап алган. Удавас бригаданың 10 чылдаарынга уткуштур, 55-ки аңгы гвардейжи мото-адыгжы (дагжы) бригаданың күрүне камгалалынга көргүскен шылгараңгай чедиишкиннерин болгаш үлүг-хуузун онзалап демдеглевишаан, чогуур шериг эргени тыпсыр дугайында дилегни база катап киирдим» – деп, Тываның Баштыңы Виктор Горемыкин-биле ужурашкан соонда, бодунуң блогунда бижээн.
Владислав Ховалыг күрүне деңнелинге шаңнап-мактаар шериг албанныгларның даңзызын Россия Федерациязының Камгалал яамызынга таныштырган. Виктор Горемыкин тыва дайынчыларның маадырлыг болгаш эрес-дидим чоруун бедии-биле үнелеп, дайынчы хүлээлгезин төлептиг күүседип турарын, чурттуң амыр-тайбың келир үезинге киирген үлүг-хуузун онзалап демдеглээнин Тываның Баштыңы дыңнаткан.
Тываның Баштыңының дилээ-биле, дайынчы хөделиишкиннер үезинде полктуң болгаш бригаданың хууда составының Ада-чурттуң болгаш күрүнениң сонуургалдарын камгалаарынга көргүскен массалыг маадырлыг болгаш эрес-дидим чоруу, чайгылыш чок болгаш эр соруу дээш, 2024 чылда Россия Федерациязының Президентизиниң чарлыы-биле бригадага "гвардейжи" хүндүлүг атты тывысканын сагындыраал.
Россия Федерациязының Чепсектиг Күштериниң Чиңгине штавының дужаалы-биле, 2015 чылдың ноябрьда Тыва Республиканың найысылалы Кызылга 55115 ниити шериг дугаарлыг 55-ки аңгы мотоадыгжы бригада (дагжы) тургустунган. Төп шериг округунуң составында дагжы мотоадыгжы бригада тускай шериг операциязының үезинде салдынган шупту даалгаларны эрес-дидим күүседип турар.
55-ки бригаданың үш дайынчызы – Мерген Донгак, Буян Куулар, Чалым Чүлдүм-оолдуң Ада-чурттуң ады дээш көргүскен дайынчы чедиишкиннерин бедии-биле демдеглеп, Россияның Маадыры деп хүндүлүг аттарны тывыскан.
