Тываның Баштыңы Владислав Ховалыг ажыл-албан аайы-биле Москвага чорааш, Россия Федерациязның саң-хөө сайыдының оралакчызы Павел Кадочников-биле ужуражып, бо чылда Тыва Республиканың бюджединиң күүселдезин чугаалашкан. Ужуражылганың түңнелинде субъектиниң казначейство чээлилерин узадырының чурумун дугурушкан.
«Эрткен чылдың деңнелинге деңнээрге, бистиң үндүрүг болгаш үндүрүгге хамаарышпас орулгаларывыстың өзүлдези демдеглеттнип, беш ай дургузунда бюджет күүселдезиниң анализинден көөрге, 18 хуу өскен» – деп, Владислав Ховалыг ужуражылга соонда бодунуң блогунда дыңнаткан.
Тываның Баштыңы сайыттың оралакчызы-биле ужуражылгада, республиканың эрге-чагыргазы бюджет күүселдезинде социал адырны – өөредилгени, кадык камгалалын, хамаатыларның чиигелделиг бөлүүнге төлевирлерни хандырар чарыгдалдар бүгү-ле социал ужур-уткалыг хүлээлгелерни күүседир айтырыгда мурнады көөр айтырыг кылдыр салганын демдеглээн.
Бюджеттиң өзүп орар чарыгдалдарын хандырары-биле федералдыг бюджеттен немелде саң-хөө дузазын хаара тудар ажылдар чоруп турар. Күрүне программаларынче регионалдыг төлевилелдерни камгалап киирер, национал төлевилелдерже Тываның киржилгезин калбартыр ажылдар план езугаар чоруп турар.
Бо неделяның эгезинде республика бюджединиң 2024 чылда күүселдезиниң түңнелдери-биле хөй-ниити дыңнаашкыннары болуп эрткенин сагындыраал. Тыва орулгаларны өстүргениниң талазы-биле Сибирьде 2-ги черни, чуртта 21-ги черни ээлээнин демдеглээн. Экономиканың боттуг сектору – даг бүдүрүлгелери, тудуг комплекизи, үлетпүр, садыг-саарылга, энергетика адырлары бүгү орулгаларның чартыындан хөй кезиин хандырган.
Болбаазырадылгадан орулгалар 1,6 катап, ажыктыг казымалдар тывыжындан – 1,7 катап, тудугдан – 2,5 катап өскен.
2024 чылда республиканың чарыгдалдары 68 млрд рубль хире болган. Ооң 45,2 ажыг млрд. рублин социал адырже – бюджет ажылдакчыларының шалың төлевиринче, Россияның Президентизиниң даалгазы-биле оларны индексациялап, өстүреринче, ол ышкаш социал ачы-дуза чедирилгезинче угландырган.
