Тываның Баштыңы Владислав Ховалыг школачыларның чайгы кадыкшыл кампаниязынга белеткелди шыңгыы хайгааралда алган. Регионнуң удуртукчузу Тес-Хем кожуунга сургакчылаашкын үезинде «Сайлык» уруглар лагерин хынаан.
«Майның байырлалдары дыштаныр чылдагаан эвес-тир, бо үеде объектилерже үнүп, бүрүнү-биле ажылдаарын кызыдар мен» – деп, ол MAX мессенджерже бодунуң каналынга бижээн.
Амгы үеде лагерьниң ийи корпузунда септелге ажылдары чоруп турар. Алдан чыл дургузунда ажылдап келген лагерьде бо дээрге бир дугаар улуг хемчээлдиг эде чаартылга төлевилели-дир. Регион «Аныяктар болгаш уруглар» национал төлевилелге киришкеш, 15 сая ажыг рубль ниити хемчээлдиг акшаландырыышкынны алган.
Уругларның айыыл чок чоруун болгаш кадыкшылын хандырарынга кол черлер – чем кылыр черде база эмчи пунктузунда ажылдар чоруп турар. Эде тудуушкун ажылдары бо айда доостур, лагерь июнь эгезинде бирги сменаны уткуп алырынга белен болур деп тудугжу, хууда сайгарлыкчы Альберт Нончат илеткээн. Сезоннуң ажыдыышкынын июнь 10-да планнаан.
Бо чайын республикада уругларның 183 лагерь, ооң иштинде 159 хүндүскү, 21 стационар, ийи майгын, бир күш-ажыл болгаш дыштанылга лагерьлери ажылдаар. 20 муң хире уругларны болгаш элээдилерни дыштанылгаже хаара тудары планнаттынган. Амгы үеде шупту лагерьлерниң материал-техниктиг баазазын быжыглаар болгаш ажылдакчыларны чыып, өөредип ажылдар чоруп турар.
«Харыысалгалыг кижилер графиктерни болгаш дүрүмнерни шыңгыы сагыырын негеп тур мен. Уругларның шынарлыг болгаш айыыл чок дыштанылгазын хандырары – бистиң ниити хүлээлгевис болур» – деп, Владислав Ховалыг демдеглээн.
Работы сотрудницы медиахолдинга «Тывамедиагрупп» вошли в первый сборник комиксов тюркоязычных народов «Йорт»
Сотрудница медиахолдинга «Тывамедиагрупп» и выпускница магистратуры по графическому дизайну Новосибирского государственного университета архитектуры, дизайна и искусств Леся Фисенко вошла в число авт…