Тываның Баштыңы Владислав Ховалыг Каа-Хем кожуунче ажыл-агыйжы үнүүшкүннү кылган. Сургакчылаашкын үезинде ол Сарыг-Сеп суурнуң Салчак Тока аттыг 2 дугаар школазынга четкен.
– Россияның Маадыры Буян Куулар-биле кады школаның чалыы армейжилери-биле ужураштывыс. Ада-чурт камгалакчыларының чылынга тураскааткан ажык кичээлди эрттирдивис – деп, Тываның Баштыңы социал четкиде бодунуң блогунда медеглээн.
Ук школаның үндезин септелгезин «Өөредилге» национал төлевилел езугаар 2023 чылда чорутканын сагындыраал. Чаартынган школада 405 уруг өөренип турар.
