Тываның Баштыңы Владислав Ховалыг республиканың барыын кожууннарынга ажыл-агый аайы-биле чорааш, Шагаан-Арыг хоорайның 1 дугаар школазының үндезин септелгезиниң, уругларның уран чүүл школазының эде чаартылгазының, ол ышкаш Чодураа суурда школа тудуунуң ажылдары бо хүнде кайы хире чоруп турарын хынаан.
«Көдээ девискээрлерниң комплекстиг хөгжүлдези» федералдыг программаның күүселдези-биле объектилерде септелге болгаш тудуг ажылдары кидин түлүк. Тываның Баштыңы хыналда соонда, ажылдың чагыкчыларынга болгаш күүседикчилеринге элээн каш даалгаларны берген.
Владислав Ховалыг Шагаан-Арыг хоорайның 1 дугаар школазынга бирги ээлчегде четкен. «Өлчей» тудуг организациязы өөредилге черинде септелге ажылдарынче апрель төнчүледир кирген. Бузуп-адырар ажылдарны чорудуп турда, немелде ажылдар база тывылган. Тудугнуң чамдык черлериниң таваан кударда бетон орнунга дойну ажыглааны билдинген. Тудугжулар ону база эде кылырлар.
"Төлевилел езугаар 640 олуттуг школада бөгүнде 1200 ажыг уруг өөренип турар. Ажылдарны шуптузун шынарлыг кылырын чедип алыр даалганы бердим. Бир эвес керээде көрдүнген түңден ажа бээр болза, бюджеттен дашкаар акша-хөреңгини немей хаара тудар бис" – деп, Владислав Ховалыг объектини көрген соонда бижээн.
Керээ езугаар ажылдар даңзызында тудугнуң серизин, шалазын, соңгаларын болгаш эжиктерин чаартыры, ол ышкаш чылыдылга, суг хандырылга болгаш канализация системаларын солууру кирген. Школаның шөлүн ажыктыг ажыглаар дээш, улуг эвес чаартылгаларны чорудар. Чаа эт-септи, өөредилге дериг-херекселдерин садары, спортчу шөлдү тудуп, чоок-кавы девискээрин чаагайжыдары көрдүнген.
Владислав Ховалыг школага четкен соонда, хоорайның төвүнде он-он чылдарда октаттынган турган тудугну көрген. Ол үелерниң дургузунда ол тудуг бок төгер черже шилчий берген. Чаартылга ажылын эгелээн тудуг чери оран-саваның богун аштап арыглаар ажылды кылып турар.
Улуг-Хем кожуун чагыргазының 2024 чылда «150 олуттуг уругларның хөгжүм школазын» тудар дугайында кииргени чагыы «Көдээ девискээрлерниң комплекстиг хөгжүлдези» күрүне программазының «Көдээ девискээрлерниң амгы хевири» федералдыг төлевилел мөөрейиниң шилилдезин эрткеш, күрүне программазының шугуму-биле федералдыг бюджеттен акшаландырар объектилер даңзызынче кирген.
"Маңаа бүрүн чаартылганы чедип алыры – бистиң сорулгавыс. "Көдээ девискээрлерниң комплекстиг хөгжүлдези" федералдыг программа дузазы-биле ону эде тудар акша-хөреңгини камгалап алган бис. Ол тудугну уругларның уран чүүл школазынга тудуп эгелээнин тус черниң чурттакчылары билир. Аңаа ону кылыр" – деп, Владислав Ховалыг тудугну эргээш, тайылбырлаан.
2026 чылдың ийиги чартыынга чедир объектиге эде чаартылга ажылдарын кылырын ол дыңнаткан. Хууда сайгарлыкчы Орлан Аракчаа тудугну эде чаартыр. Керээниң түңү – 178 сая рубль хире.
Тываның Баштыңы Улуг-Хем кожуунга чорааш, «Көдээ суурларның амгы хевири» төлевилел-биле Чодураа суурда тудуп эгелээн 176 олуттуг школаны база көрген. Объектиде ажылдар төнчү чадазынче кирген болган.
