Республиканың чаңгыс демнигжилери Тываның Баштыңының Дээди Хуралга Айыткалында салган айтырыгларны шиитпирлээринге идепкейлиг киржир. Тываның Баштыңы, партияның регионалдыг салбырының секретары Владислав Ховалыгның киришкени партияның регионалдыг политчөвүлелиниң хуралында ооң дугайында дыңнаткан.
Айыткалда 2025 чылды – Ада-чурт камгалакчызының чылы кылдыр чарлап, тускай шериг операциязының киржикчилеринге болгаш оларның өг-бүлелеринге ачы-дузаны көргүзер дээн эгелээшкинни чаңгыс партийжилер бир үн-биле деткээннер.
Политиктиг чөвүлел Тываның Баштыңының Айыткалының негелделерин барымдаалап, 2024 чылдың соңгулда кампаниязының түңнелдери-биле тургустунган «Чаңгыс демниг Россияның» Тыва регионалдыг салбырының Улусчу программазының төлевилелинге чогуур өскерилгелерни болгаш немелделерни киирерин шиитпирлээн. Программаның сөөлгү хевири шилилгениң ийи чадазын эртер.
– Бирги чадада келир үениң программазының талазы-биле партия иштинде сайгарылганы организастаары чугула: хүн бүрүнүң бөдүүн айтырыглардан эгелээш, улуг хемчээлдиг хөгжүлде төлевилелдеринге болгаш республиканың келир үеде сайзыралынга чедир.
Баштай программага чоннуң бүгү талалыг сайгарылгазын эрттирип, амгы үениң бергелеринге, бергедээшкиннеринге болгаш айтырыгларынга харыыларны кады тып, бурунгаар шимчээриниң бүзүрелдиг үндезинин тургузуп алыр. Улусчу программаның амгы пунктуларынга хамаарыштыр ажык хөй-ниити илеткелинге белеткенир ужурлуг – деп, Владислав Ховалыг демдеглээн.
«Чаңгыс демниг Россия» партияның бодунуң иштинде 2025 чылды муниципалдыг депутаттың чылы кылдыр чарлаан. Акцияның сорулгазы – кожууннуң төлээлекчилер хуралдарында эге организацияларның болгаш оларның төлээлериниң күчү-күжүн эң-не бедик деңнелге шимчедири. А ол дээрге 1,5 муң хире хөй-ниитижи депутаттың дыка улуг күжү-дүр. «Кижи бүрүзү арга-дуржулгалыг, бодунуң девискээриниң, ында чурттап турар чонунуң бергелерин билир» – деп, Владислав Ховалыг айыткаш, партия кежигүннериниң арга-дуржулгазынга «черден» даяныры – Улусчу программаны чедиишкинниг күүседириниң эң бүзүрелдиг бадыткалы дээрзин онзалап демдеглээн.
