Тываның Баштыңы Владислав Ховалыг биле «Ростех» күрүне корпорациязының чиңгине директору Сергей Чемезов кады ажылдажылга дугуржулгазынга атты салган. Документиде корпорацияның эртем-техниктиг, төлевилел болгаш бүдүрүлге аргаларын ажыглап тургаш, регионга инвестиция төлевилелдерин боттандырарын база амгы үениң үлетпүр бүдүрүлгезин тургузарын көрген.
Кады ажылдажылганың мурнады көөр угланыышкыннарының аразында регионнуң инфратургузуун хөгжүдери, ооң иштинде күрүне-хууда кады ажылдажылга арга-хевирлерин ажыглаары кирген. Ажыктыг тывыш адырынга, экология болгаш бойдус камгалалының талазы-биле кады ажылдаар сорулгалыг.
Оон аңгыда дугуржулга чурагайлыг, “угаанныг хоорай” системаларны болгаш кадык камгалал адырында төлевилелдерни кады боттандырарын көрген. Регионда эмнелге албан черлери «Ростех» бүдүрүлгелеринде бүдүрген мурнакчы техниктиг шиитпирлерни делгереңгей ажыглаар аргалыг апаар.
«Тывада ажылдап эгелээн «Ростех» структуралары республиканың социал-экономиктиг амыдыралынга идепкейлиг киржип турар. Бөгүн ат салган дугуржулганың күүселдези Тываның хөгжүлдезинге, бойдус камгалалынга кол черни ээлээр үлетпүр курлавырын шынарлыг ажылдадырынга салдарлыг болур ужурлуг деп идегеп турар бис. Ростех-биле кады ажылдажылга бистиң республикага бодунуң хүлээлгелеринге харыысалгалыг болурунга бүзүрелди берип турар» – деп, Владислав Ховалыг демдеглээн.
Бо хүнде Ростех Тывада элээн каш төлевилелдерни боттандырып турар. 2023 чылда регионга өрүмнээр болгаш чазылдырар ажылдарга эмульсиялыг частыр бүдүмелдер холуксаазын бүдүрер заводту ажыткан. Корпорация республикада казымалдар дилээр болгаш бүдүрер улуг төлевилелдерни база чорудуп турар.
«Тыва – чурттуң эң-не чараш, бойдус курлавырлары-биле байлак региону. Девискээрни хөгжүдер талазы-биле, үлетпүр болгаш даг-болбаазырадылга адырларынга бүдүрүлгелерни тудуп, аңаа ажылдаар аныяктарны болгаш мергежилдиг тускай мергежилдиглерни хаара тударынга чурттаар болгаш ажылдаар таарымчалыг байдалдарны хевирлээр талазы-биле республиканың арга-шинээ улуг. Бо сорулгаларны чедип алыры-биле хемчеглерни кады тургузуп, чазак биле бизнестиң удур-дедир деткижилгези чугула» – деп, Сергей Чемезов демдеглээн.
«Ростех» күрүне корпорациязы Россияда эң улуг машина-тудуг компаниязы. Чурттуң 60 регионунда 800 ажыг эртем болгаш үлетпүр организациязын каттыштырып турар. Компания күрүнениң камгалал чагыы езугаар чепсек, шериг болгаш тускай техниканың кол хандырыкчызы кылдыр ажылдап турар. Ол чуртка эчмс сорулгалыг чугула ажыл-агыйларда бедик технологиялыг хамааты бүдүрүлгени сайзырадып турар, чижээ, авиа бүдүрүлгези, шимчедикчилер тудуу, транспорт болгаш энергетика машина тудуу, эмнелге дериг-херекселдер бүдүрүлгези, фармацевтика, чаа материалдар дээш, оон-даа өске.
Корпорацияның портфелинде КамАЗ, ОАК, “Россияның вертолеттары”, ОДК, Уралвагонзавод, “Швабе”, “Калашников” концерн, КРЭТ, “Бедик шынарлыг комплекстер», «Русэлектроника», «Нацимбио» дээш оон-даа өске ындыг билдингир компаниялар бар. 2023 чылда ооң ниити орулгазы 2,8 триллион рубль ашкан.
