Тываның Баштыңы Россия Федерациязында Моолдуң онза болгаш бүрүн эргелиг элчини Улзийсайхан Энхтувшин-биле ужурашкан. Владислав Ховалыг социал четкилерде бодунуң арынында элчин-биле кандыг айтырыгларны чугаалашканын дыңнаткан.
Владислав Ховалыг ийи чоннуң ниити төөгүзү, дөмейлешкек культуразы болгаш езу-чаңчылдары аңгы-аңгы угланыышкыннарга кады ажылдажылганы идепкейлиг сайзырадыр арганы бергенин демдеглээн. Моолдуң алды аймаа-биле ийи талалыг сырый харылзаа тургустунган. Тыва-биле Моолдуң сайгарлыкчылары удур-дедир кады ажылдажылгалыг бизнес-миссияларны эрттирип, кады төлевилелдерни боттандырып турарлар.
Ужуражылга үезинде кижилер, транспорт аймаа база чүъктер аай-дедир аргыштырылгазын калбартырының аргаларын аңгы чугаалашкан. Тываның Баштыңы сөөлгү беш чылда Тывадан Моолче экспорт 3,5 катап өскенин демдеглээн. «Красноярск – Абакан – Кызыл – Улаангом– Ховд – Урумчи» чурттар аразының автомобль оруу ажыттына бээрге, чурттар аразының садыг-сайгарылгазының хемчээли оон-даа улгадыр.
Ийи тала кызыгаар пунктуларының болгаш каайлы постуларның эрттирилге аргаларын улгаттырар ужурлуг хемчеглерни кады ажылдап кылыр деп чаңгыс шиитпирге келген.
Владислав Ховалыг биле Улзийсайхан Энхтувшин «Хандагайты – Боршоо» автомобиль эрттирилге пунктузун хондур-хүнзедир ажылдаар чурумче шилчидериниң, ол ышкаш Кызыл биле Улан-Батор аразынга авиааргыжылганы келир чылын уламчылаар дугайында айтырыгларны РФ-тиң биле МАР-ның тускай угланыышкынныг албан черлер деңнелинге шиитпирлээрин дугурушканнар.
