Владислав Ховалыг «Росчетки» бөлүүнүң чиңгине директору Андрей Рюмин-биле ужурашкаш, Тываның энергетика инфратургузуун хөгжүдериниң келир үезин чугаалашкан.
Тываның девискээринде системаны тургускан четки организациязы болгаш бүзүрелдиг электри энергиязын хандырар харыысалгалыг чаңгыс аай төвү болур «Росчетки Сибирь Тываэнерго» компанияның ажылынче база регионнуң энергетика комплекизиниң хөгжүлдезинче кол кичээнгейни угландырган.
«Росчетки» бөлүүнүң удуртулгазы-биле ужуражылгада Тывага энергетика-биле хандырылганың комплекстиг планын боттандырарының кол угланыышкыннарын чугаалашкан. «Росчетки Сибирь Тываэнерго» компанияга дамчыткан электри четкилерин чаартыр талазы-биле хемчеглерниң чоруп турарынче онза кичээнгейни угландырган. «Росчетки» компаниязы Тывага энергетика хандырылгазының комплекстиг планының күүселдези-биле элээн каш эчис сорулгалыг төлевилелдерни доозуп турарын Андрей Рюмин демдеглээн.
«Ылаңгыя, Саян-Шушенск ГЭС-тен электри энергиязын дамчыдарынга киржип, Тываны хандырган энергетика дээрбээниң составында кирип турар 500 кВ күчүлүг «Означенное» дузалал станцияның трансформатор күчү-күжүн улгаттырарының дугайында чугааны чоруткан. Бурунгаар сорулгаларның аразында “Шушенская-опорная – Туран – Кызылская” 220 кВ транзит шугумунуң күчү-күжүн чаа электри шугумнарын тутпушаан улгаттырары көрдүнген. Төлевилелде бистиң республиканың төп болгаш чөөн кожууннарын чырык-биле хандырып турар 220 кВ Туран подстанциязының эде чаартылгазы кирген» – деп, Владислав Ховалыг чугааның түңнелин дыңнаткан.
Энергетика четкизиниң компаниязының мурнады көөр сорулгазы – Ак-Сугнуң чес чыдынында даг-тывыш бүдүрүлгезин четкиге кожуп, Кызылдың болгаш ол чоок-кавы кожууннарның электри хандырылгазын экижидеринче угланган төлевилелдерни боттандырары.
Тываның Баштыңы бо хемчеглер Тываның энергетика системазының бүзүрелдиг чоруун элээн бедидеринче, регионнуң социал-экономиктиг турум хөгжүлдезинге байдалдарны тургузарынче база чаа инвестицияларны хаара тударынче угланган дээрзин демдеглээн.
Владислав Ховалыг ооң мурнунда Тываның Дээди Хуралынга Айыткалында чоннуң амыдырал-чуртталгазының шынарының көргүзүглериниң бирээзи энергия хандырылгазының бүзүрелдиг болгаш чедингир болурунуң чугулазын онзалап демдеглээн болгаш «Росчетки» бөлүүнүң удуртулгазынга деткимчези дээш четтиргенин илереткен.
