«ВТБ» банкының бирги офизиниң Кызыл хоорайда ажыттынганы-биле ужуражылганы эрттирген. Чуртта улуг саң-хөө организациязының ажыттынганы республиканың чурттакчыларынга банк ачы-дузаларын алыр арганы калбартыр. «ВТБ» банк республиканың чонундан эгелээш улуг бизнес төлээлеринге ачы-дуза чедирилгезин калбаа-биле чорударынга беленин дыңнаткан.
Кызыл хоорайның төвүнде ажыттынган «ВТБ»-ниң офизи Тывада бир дугаары болур. Банк активиниң хемчээли-биле Россияда ийи дугаар, устав капиталының хемчээли-биле бирги черде база үүрмек бизнестиң хемчээли-биле Ажаалга банкызының соонда, ийиги черде. «ВТБ» – күрүне-биле ажылдажылгалыг российжи коммерциялыг банк болур: бөлүктүң акционерлиг капиталының 92 хуузу күрүне хыналдазында акцияларны хаара тутканындан, анаа акцияларының 60,9 хуузу күрүнеге онаажыр.
Бо чылдың июньда Петербургтуң экономиктиг делегей шуулганының үезинде, Тываның Баштыңы [id360104045|Владислав Ховалыг] биле ВТБ банкының президентизиниң оралакчызы – баштаар чериниң даргазы Денис Бортников «ВТБ» банкының удуртулгазы-биле Тываның Чазааның аразында кады ажылдажылга дугайында дугуржулгага аттарны салган. Ынчан Денис Бортников, банк регионалдыг компанияларны хөгжүдер талазы-биле, чуртталга тудуушкунунуң, күрүне деткимчезиниң арга-хевирлерин ажыглап биче болгаш ортумак бизнес адырында төлевилелдерни акшаландырарынга киржир планныын айыткан.
Владислав Ховалыг регионда чаа саң-хөө организациязын республиканың амыдыралынче дүрген кииреринге, ол ышкаш кадрлар шилилдезинге сонуургалдыын демдеглээн.
– Кызылда чаа офистиң удуртукчузунда бистиң республикада банк системазынга хөй чылдарда ажылдаан Елена Толстихинаны томуйлаан. Офис чурттакчы чонну-даа, регионда ортумак болгаш улуг бизнес төлээлерин-даа хандырар, универсалдыг болур. Бөгүнгү ужуражылгада моон-даа соңгаар кады ажылдаарының аргаларын сайгарып чугаалаштывыс. «ВТБ» банкының дыка хөй социал болгаш өске-даа чугула айтырыгларны боттандырарынга биске дузалажыр күзелин илереткен – деп, ол ужуражылга соонда бодунуң блогунда дыңнаткан.
«ВТБ» банкының Красноярск крайда, Хакас база Тыва республикаларда удуртукчузу Александр Ванюшкин деткимчези болгаш кады ажылдажылгазы дээш республиканың чазаанга четтиргенин илереткеш, банкының социал ажыл-чорудулгазында планнарын чугаалаан.
– Регионнуң чурттакчылары, өг-бүлелер, кандыг-даа хемчээлдиг бизнес-биле ажылдаарынга белен бис. Эрге-чагырга төлээлери-биле үре-түңнелдиг харылзаа тургустунган, ам шупту угланыышкыннарда республиканың чаагай чоруун хөгжүдеринге киржир бис. Ооң иштинде социал адырга: бистиң ажылывыстың чугула угланыышкыннарының бирээзи – саң-хөө билиглериниң төлевилелин күүседир» – деп, Александр Ванюшкин тайылбырлаан.
Чурттакчы чонга таарымчалыг болур кылдыр офисте ийи банкоматты тургускан, хереглелди көрүп тургаш, чоорту ооң санын көвүдедир чадавас. Александр Ванюшкин «ВТБ» банк продуктуларын калбартыр шугумда Тывага боттарының офистерин калбартырын чугаалаан.
Бөгүн Тываның Чазаанга, Тываның Саң-хөө яамызы биле «ВТБ» саң-хөө билиглериниң адырында кады ажылдажылга дугуржулгазынга атты салганнар. Чурттакчы чоннуң саң-хөө билиглерин бедидер хемчеглер планында, Тываның чурттакчыларынга, ооң иштинде улуг назылыг кижилерге, школаларга, дээди өөредилге черлеринге чүгле банк ачы-дузаларын ажыглаарынче угланган эвес, а саң-хөө мегелээшкиннеринге удур туржуп билир кылдыр өөредиглерни эрттирери кирген.
