Тываның Националдар херектериниң талазы-биле агентилели Тываның Баштыңының хамааты ниитилелди хөгжүдеринче угланган грантызынга чылдың-на эртип турар мөөрейниң түңнелдерин чарлаан.
Бо чылын шилилгени «Электроннуг бюджет» системазы-биле бир дугаар эрттирип, ажык-чарлыг чорукту хандырганын Владислав Ховалыг бодунуң Телеграм каналында дыңнаткан. Грант акшаландырыышкынының ниити хемчээли 13 сая рубль болган. Президентиниң грантылар фондузу болгаш регионалдыг бюджеттен акшаландырыышкынны чоруткан.
Бо чылын мөөрейге киржир чагыгларны август 4-тен сентябрь 18-ке чедир хүлээп алган. Коммерцияга хамаарышпас организациялардан ниитизи-биле 69 билдириишкин кирген, 6 киржикчи чагыын катап эгидип алган. Хыналда соонда, коммерцияга хамаарышпас 53 организациядан 63 чагыгның 60-ы эксперт үнелелин алган.
Владислав Ховалыг мөөрейниң түңнелдерин бодунуң Телеграм каналынга чарлап тура, төлевилел бүрүзү чүгле саазынга бижиттинген эгелээшкин эвес, а республиканы экижидер изиг күзел болур ужурлуг дээрзин демдеглээн.
«Бо төлевилелдер бистиң республиканың амыдыралының чугула адырларын хаара туткан: өг-бүлелерни деткииринден база кадыкшылды камгалаарындан эгелээш, тускайлаң культуравысты болгаш дылывысты кадагалап арттырарынга чедир. Ол эгелээшкиннерниң боттаныышкыны Тываның шупту чурттакчыларынга боттуг ажыкты эккээр дээрзинге бүзүрээр мен» – деп, республиканың Баштыңы айыткан.
Аңгы-аңгы адырлардан 12 тускай эксперттен тургустунган эксперт комиссиязында 4 күрүне хамааты албан хаакчызы, хөй-ниити организацияларының 8 төлээлери кирген. Олар 20-ден 100 баллга чедир 10 критерийлерге даянып үнелелди кылган. Эксперт чөвүлелиниң составындан шилиттинген ийи эксперттен хөй кижи чагыг бүрүзүнге демдектерни салган.
Эксперт комиссиязының хуралының түңнелинде конкурстуң тиилекчилери билдинген:
1. «Тыва Республиканың Күш-шыдал спортунуң федерациязы» регионалдыг хөй-ниити күш-культура болгаш спорт организациязының «Балыгланып-берттингеш инвалид болган тускай шериг операциязының киржикчилериниң аразынга «Күжүвүс чаңгыс демивисте» деп күш-шыдал спортунуң маргылдаазы» төлевилели. Грантының угланыышкыны: социал хандырылга, хамаатыларга социал деткимче болгаш камгалал.
2. «Коммерцияга хамаарышпас организацияларны деткиир болгаш дуза чедирер төп» автономнуг коммерцияга хамаарышпас организацияның «Аныяктар экстремизмге удур» студентилер шууланы» деп төлевилели. Грантының угланыышкыны: экстремисчи болгаш терроржу идеологияны болдурбазы.
3. «Тыва Республиканың аныяк эртемденнер болгаш специалистер чөвүлели» регионалдыг хөй-ниити организациязының «Тыва дылга чугаа технологиялары» төлевилели. Грантының угланыышкыны: Россия Федерациязының чоннарының бот-тускайлаңын болгаш дылдарын кадагалап, камгалаары.
4. «Рассвет» деп аутизмниг кижилерге дуза көргүзер автономнуг коммерцияга хамаарышпас организацияның «Кызылда аутизм аарыглыг болгаш өске-даа сагыш-сеткил талазы-биле бергедээшкиннерлиг уругларның АВА-төвү» деп төлевилели. Грантының угланыышкыны: өг-бүлелерге, иелерге, адаларга болгаш уругларга деткимче.
5. «Номад» гуманитарлыг шинчилелдер төвү» автономнуг коммерцияга хамаарышпас организацияның «Тыва: культуралар болгаш чоннар аразында чугаа» деп төлевилели. Грантының угланыышкыны: культура болгаш уран чүүл адырында төлевилелдерни деткиири.
6. «Дамырак» арага болгаш наркотиктиг бүдүмелдерден хамаарылгалыг кижилерге деткимче төвү» автономнуг коммерцияга хамаарышпас организацияның «Этнокультурлуг сүлде-сүзүк өнчүзү – өгбелерниң мерген угааны» деп төлевилели. Грантының угланыышкыны: чоннуң кадыын камгалаары, кадык амыдыралды суртаалдаары.
7. Культура адырында «Онза» деп республиканың хөй-ниити организациязының «Тывада амгы үениң чурулга уран чүүлүнде буддийжи темалар болгаш овур-хевирлер» деп бот-тывынгыр чурукчулар ортузунга I республика делгелге-мөөрейин эрттирер төлевилели. Грантының угланыышкыны: культура болгаш уран чүүл адырында төлевилелдерни деткиири.
8. Чурттакчы чоннуң кадыкшылын камгалаар болгаш амыдырал-чуртталгазының шынарын бедидер талазы-биле бот-тускайлаң коммерцияга хамаарышпас «Тыныш» организацияның «Кижилерниң социал аажы-чаңын эдип-чазаар, катап социализастаар, социал чаңчыгыышкыны база реабилитациязы, ол ышкаш чаа кем-херек үүлгедиишкиннерин болдурбас дээш шенелде төптү тургузуп база ооң ажылын организастаары» төлевилели. Грантының угланыышкыны: социал хандырылга, социал деткимче болгаш хамаатыларның камгалалы.
9. «Тыва Республиканың Ада-чурт дайынчыларының өг-бүлелериниң комитеди» автономнуг коммерцияга хамаарышпас организацияның «ТШО киржикчилерин болгаш оларның өг-бүлелеринге комплекстиг реабилитация болгаш адаптация программазы» деп төлевилели. Грантының угланыышкыны: хамаатыларның кадыкшылын камгалаары болгаш кадык амыдыралды суртаалдаары.
Мөөрейниң организатору – Тываның Националдар херектериниң талазы-биле агентилел. ВКонтакте социал четкилерде агентилелдиң vk.com/wall-136981422_8926арынында конкурстуң түңнелдерин салган.
Эрткен чылын 12 социал эгелээшкин мөөрейге тиилээн. «Культурлуг автобус», «Интернет делгеминде тыва дыл», «Игротека.BIB», Тываның ыраккы Мөңгүн-Тайга кожуунунга сарлыкчылар фестивалы дээн ышкаш, солун төлевилелдер грант деткимчезиниң ачызында боттанганын сагындыраал.
