Тыва биле Хакасия кожа-хелбээ девискээрлерде өрттерни өжүрерде кады ажылдажылга дугуржулгазынга аттарны салган. Енисей Сибириниң ийи регионунуң административтиг-территориалдыг кызыгаарында 240 километрде шөйлү берген тайганы өрттен хайгаараар болгаш камгалаар дугайында чугаа чоруп турар.
Хакасияның арга-арыг сайыды Олег Матвиенко баштаан делегация Тывага кээп, коллегалары-биле ужуражылга үезинде дугуржулга чардынган. Аңаа Тываның өмүнээзинден ТР-ниң бойдус сайыды Григорий Ондар атты салган. Кожа-хелбээ черлерде арга-арыг өрттерин илередир болгаш оларны өжүрер талазы-биле сырый кады ажылдажылганы тургузарын ийи тала дугурушкан.
Дугуржулгада республикаларның административтиг кызыгаарларынга өрттер үнген таварылгада арга-арыг өрт албаннарының дугуржулгалыг хөделирин айыткан. Бир эвес республикаларның административтиг кызыгаарларынга азы ол чоогунга өрттер илереттинер болза, ийи регионнуң арга-арыг өртчүлери кады ажылдаар.
Март айда Тываның болгаш Хакасияның арга-арыг ажылдакчылары кожа-хелбээ черлерде арга-арыг өрттерин болдурбазы-биле командалыг-штаб өөредилгезин кады планнаан.
Григорий Ондар биле Олег Матвиенко регионнар аразында үр үеде тургустунган кады ажылдажылганы хоойлу езугаар херек кырында дугуржулга-биле быжыглаттынган деп демдеглээннер. 2024 чылдың кааң чайында арга-арыг өрттери-биле демиселге хакас десантчылар ниитизи-биле 40 муң ажыг гектар черде 200 ажыг тайга өрттерин өжүрүшкенин сагындырган.
Дугуржулга камгалалдыг арга-арыг черлеринге хамааржырын ийи сайыт демдеглээн. Тыва биле Хакасияның аразында Саян сыннарының элээн каш черлери – «Убса-Нур ыйгылаажы» ЮНЕСКО-нуң бүгү делегей өнчүзүнде, Тыва талазында Хаан-Дээр девискээри камгалалдыг чер бар. А Убса-Нур ыйгылаажы скиф үезинден бээр бодунуң бойдус байлаан өскерилге чок арттырып алган делегейде ховар чер болурун сагындыраалыңар.
