Тываның Чаа чылдың байырлал хемчеглеринге белеткел эгелээн

Тываның Баштыңы Владислав Ховалыгның федералдыг болгаш республика албан черлериниң удуртукчулары база кожуун чагырга даргалары-биле эрттирген аппарат хуралында, ажылчын коллективтерге Чаа чыл кежээлерин эрттирерин база чазылдырар чүүлдер ажыглап, ыыт-шимээн үндүрерин шеглээрин сүмелээн.

Владислав Ховалыг тускай шериг операциязы чоруп турар нарын үени сагындырып, ол кызыгаарлаашкынны билип көөрүн кыйгырган. А уруглар байырлалдары анаа эрттирер: «Тускай операция чоруп турар үеде, Чаа чылды ыыт-шимээнниг, калбаа-биле байырлаары таарымча чок шиитпирге келдивис. Тускай шериг опреациязының девискээринде амы-тынын артынга каггаш, бистиң айыыл чок чоруувусту камгалажып чоруур оолдарывыска хамаарыштыр ол шын шиитпир. Школаларга болгаш уруглар садтарынга утренниктер эртер, тускайлаан шөлдерге Чаа чыл елкаларын тургузар. Ындыг болзажок, кандыг-даа өнчүнүң организацияларынга массалыг хемчеглер, концерттер, фейерверктер эрттирерин өйлээрин саналдап тур мен» – деп, Тываның Баштыңы бодунуң блогунда ону тайылбырлаан.

Тываның Баштыңы республиканың чазаанга чогуур айтыышкынны белеткеп, ооң күүселдезин хыналдага алырын хүлээндирген. Шак ындыг кызыгаарлаашкыннар чурттуң өске регионнарында база хүлээп алдынганын Владислав Ховалыг демдеглээн.

Чаа чылдың уруглар хемчеглеринге белеткел эгелээн. Тываның Чазаа республика девискээринге байырлалды белеткээр болгаш эрттирер республика оргкомитединиң хуралын эрттирип, массалыг хемчеглер үезинде айыыл чок чорукту хандырарының айтырыгларын сайгарып чугаалашкан.

Кызылга кол утренниктер, Елка чанынга оюн-көргүзүглерден аңгыда, Тываның Национал хөгжүм-шии театрынга, Ойнаар-кыстар театрынга, Национал музейге, Тыва үндезин культура төвүнге, Орус культура төвүнге, Тываның күрүне филармониязынга шиилер болур.

Республиканың муниципалитеттеринге «Соок-Ирейниң оруу-биле» хөй ажы-төлдүг болгаш амыдыралы чегей өг-бүлелерге Соок-Ирей аалдап чедер. Өг-бүлелерге болгаш уругларга социал дуза төптери боттарының хайгааралында уругларга байырны чедирер.

Бо чылдың декабрь 24-те В. Көк-оол аттыг Национал хөгжүм-шии театрынга болуп эртер Тываның Баштыңының чаңчыл болу берген Ёлказы – республиканың уругларынга Чаа чылдың эң кол болуушкуну. Ынаар тергиин өөредилгелиг өөреникчилерни, амыдыралдың берге байдалында таварышкан өг-бүлелерден уругларны, өскүс болгаш ада-иезиниң хайгааралы чок арткан уругларны, республиканың шупту хоорайлары болгаш кожууннарындан тускай шериг операциязының киржикчилериниң ажы-төлүн чалаар.

Республикага шупту 1300 ажыг байырлал хемчеглери болур, оларның 1200-ү – муниципалитеттерге, 90 ажыы – республика деңнелинге. Республиканың оргкомитединиң негелдези езугаар, Чаа чылдың шупту хемчеглери, бал-маскарадтар 21 шакка чедир доостур ужурлуг.