Тываның Баштыңы Владислав Ховалыгның удуртулгазында эрткен аппарат хуралында, республиканың Чазаа биле Дээди Хурал (парламент) кады ажылдажылга дугайында дугуржулганы чарганнар. Аңаа аттарны регионнуң удуртукчузу биле парламентиниң даргазы Кан-оол Даваа салган.
Ук дугуржулга эрге-чагырга органнарының удур-дедир ажылдажылгазын экижидип, хоойлу чогаадылга ажыл-чорудулгазын сайзыраңгайжыдарынга чугула документ апаарын Владислав Ховалыг бодунуң блогунда демдеглээн. Регионнуң социал-экономиктиг хөгжүлдезинче угланган төлевилелдерни тургузарынга, хоойлу төлевилелдерин ажылдап кылырынга, информация солчулгазынга идепкейлиг кады ажылдажылганы бээр ужурлуг.
2024 чылдың сентябрьда соңгуткан Дээди Хуралдың чаа составында аңгы-аңгы партияларның («Чаңгыс демниг Россия», РФКП, РЛДП болгаш «Чаа кижилер») төлээлери кирген болгаш, ооң бодалы-биле үре-түңнелдиг ажылдаарынга үндезин барын, Тываның Баштыңы сагындырган.
Дээди Хуралдың даргазы Кан-оол Даваа, бодунуң ээлчээнде, дугуржулга эрге-чагырга органнарының аразында кады ажылдажылганы быжыглап, регионнуң чугула айтырыгларын дээштиг шиитпирлээринге дузалаар дээн бүзүрелин илереткен. Республиканы хөгжүдеринге идиг бээр документ үр хуусаада база тургузукчу кады ажылдажылгага үндезин болурун ол демдеглээн.
Январьның 23-те, бо четвергде, Тываның Баштыңы Владислав Ховалыг депутаттар мурнунга чылдың Айыткалын бээр. Ол эрткен чылдың түңнелдерин үндүрүп, 2025 чылда мурнады боттандырар угланыышкыннарны айтыр.
«ВКонтакте» социал четкиде регионнуң баштыңының албан езунуң арнындан хемчегниң дорт дамчыдылгазын көрүп болур.Показать список поделившихся2 ч назад
