Тывада социал угланыышкынныг коммерцияга хамаарышпас организациялар 2024 чылдан эгелеп Күрүне ачы-дузазының чаңгыс аай порталын, ылаңгыя ооң «ГосВеб» иштики системазын ажыглап тургаш, Интернетте боттарының арыннарын тургузуп, оларның ажыл-чорудулгазын хандырар аргалыг апаар.
Күрүне шөлчүгежинде сайтыларны тургузары оларга бедик деңнелдиг информацияның айыыл чок чоруун болгаш кибер халдаашкыннардан камгалалды бээр, ол чүүл ылаңгыя тускай шериг операциязының киржикчилеринге дуза кадып турар коммерцияга хамаарышпас организацияларга чугула.
Бо неделяда Тываның Чазаа регионнарда коммерцияга хамаарышпас организацияларга күрүне деткимчезиниң чаа хевирин көргүзер дүрүмнерни бадылаан. Оларның дыңнатканы болза, мөөрей информация деткимче алыкчызын тодарадыр. Федералдыг Чазактың Тывага тургускан 2024 чылдың квотазы езугаар чүгле чаңгыс хөй-ниити организациязы ону ажыглаар.
Мөөрейге тиилээр дизе, организация элээн каш негелделерге дүгжүр ужурлуг. Бирээде, бүрүткеткен хүнден эгелеп эвээш дизе бир чыл ажылдаан болгаш бойдустуң, экологтуг, техногенниг азы өске-даа айыыл-халаптар үезинде, социал, национал, шажынчы чөрүлдээлерде, өскээртен келген кижилерге болгаш өскээр көжүрген кижилерге дузалажыры дээн ышкаш ажыл-чорудулгалыг болур.
Оон аңгыда, коммерцияга хамаарышпас организациялар ачы-дуза чедирер хемчеглерни болгаш эки турачы ажылды организастаар, шериг-ада-чуртчу кижизидилгени, кижилерниң сүлде-сүзүүн сайзырадыр дээш, оон-даа өске ажылдарны чорудар ужурлуг.
Тываның Чурагайлыг хөгжүлде яамызы мөөрейни организастап эрттирер. Республика Чазааның бадылааны комиссия шилилгени кылыр. Мөөрейниң тиилекчизин күрүне деткимчезин алганнарның аразынче киирери-биле, мөөрейниң түңнелдерин Россия Федерациязының Чурагайлыг хөгжүлде, харылзаа болгаш массалыг коммуникация яамызынче октябрь 1-ге чедир киирер.
