Тываның социал четкилеринге даштыкы хамааты Кызыл хоорайның назы четпээн чурттакчызынче күш дөгеп халдаанының соонда ВИЧ-халдавырны чыпшырган дугайында меге бижикти таратканындан, Кызылда даштыкы чурттарның төлээлеринче элээн каш бөлүк халдаашкыннар болган. Кызылда РПС садыг баазазында ажылдап турган элээн каш кижи кемдээн. Даштыкы хаматылардан элээн каш кижи эмчи дузазын дилеп келген.
Ынчап кээрге, РФ-тиң Истелге комитединиң Тыва Республикада истелге эргелели назы четпээн кижиге халдавырны чыпшырган дугайында медээни буруу шапкан. Назы четпээн кижиже халдаан кижиге онааштыр буруудадыр кеземче херээн оттурган, буруудаттырган кижини хоругдалда алган.
Корум-чурум камгалаар органнар РПС баазазынга чөрүлдээге киришкен кижилерни тудуп хоругдаан.
Тываның Чазаа республиканың чурттакчыларын хоойлуга дүүшпес үүлгедиглерже кыйгырган чүүлдерге алыспазын кыйгырып тур. РФ-тиң Истелге комитединиң ТР-де истелге эргелелиниң истекчилери назы четпээн кижиге халдаанының дугайында кеземче херээниң истелгезин дооскаш, судче чоруткан. Амгы хоойлу езугаар шупту кем-херек үүлгедикчилери харыысалгага онаажыр.
Чөпшээрел чок хөй-ниити хемчеглерин эрттирер оралдажыышкыннар, ол ышкаш оларның киржикчилериниң талазындан кандыг-даа күткүүшкүннүг чоруктар хөй-ниити корум-чурумунга айыыл кылдыр санаттынар болгаш дораан-на ону чайладыр. Чөпшээрел чок хөй-ниити хемчеглеринге киришкен хамаатылар административтиг чурум үүлгедиишкининиң киржикчизи апаар.
РФ-тиң Административтиг корум-чурум үрээшкиннериниң дугайында хоойлунуң 20.2 чүүлүнүң 2 кезээ езугаар (хөй-ниити хемчээн эрттирер дугайында дүрүмде айыттынганы дыңнадыышкын чокка хөй-ниити хемчээн организастааны азы эрттиргени дээш) 200 муң рубль чедир хемчээлдиг административтиг торгаалга, азы 50 шак чедир албан ажылдаар кылдыр, азы 10 хонук чедир хуусаага административтиг хоругдалдың кеземчезин онаары көрдүнген.
РФ-тиң Административтиг корум-чурум үрээшкиннериниң дугайында хоойлунуң 20.2 чүүлүнүң 6.1 кезээ езугаар (чөпшээрел чок хуралдарга, митингиге, чыскаалга, чыышка азы удурланыышкынга киржилге дээш) 300 муң рубль чедир хемчээлдиг административтиг торгаалга, азы 100 шак чедир албан ажылдарынга ажылдаар кылдыр, азы 15 хонук чедир хуусаага административтиг хоругдалдың кеземчезин онаары көрдүнген.
Оон аңгыда РФ-тиң Кеземче хоойлунуң 212.1 чүүлү-биле (хурал, митинг, чыскаал, чыыш азы удурланыышкынны организастаар азы эрттирер дугайында доктааткан чурумну хажытканы дээш) кеземче харыысалгазы көрдүнген. Ук кем-херек үүлгедиишкини дээш 5 чыл чедир хосталгазын казыттырып болур.
