Тываның Баштыңы Владислав Ховалыгның удуртулгазы-биле Тываның чазаанга террорга удур регионалдыг комиссияның хуралы болуп эрткен. Республика девискээринге терроржу идеологияга удур комплекстиг планның күүселдези – хүннүң кол айтырыы болган. Багай салдарга алзып болур хире школачылар болгаш аныяктар-биле ажылынче онза кичээнгей угланган.
ТР-ниң Өөредилге сайыдының хүлээлгезин күүседип турар Ренат Ооржактың дыңнатканы-биле алырга, патриотчу, интернационалчы, шажын чүдүлге кижизидилгезинге хамаарышкан ниити профилактиктиг хемчеглерден аңгыда, республикага экстремисчи болгаш терроржу идеологияны илередип, ооң тарап нептерээрин болдурбазын чедип алыр сорулгалыг тускай төлевилелдер база боттанып турар. Информация технологияларының техникумунуң сургуулдары хоралыг болгаш хоруглуг медээлерлиг хөй-ниити арыннарын илередири-биле «Киберхайгыылды» тургускан. Тываның университеди интернет четкизинден хоойлуга удур медээлерни дилээр эки турачыларны өөредип белеткээн.
Владислав Ховалыг террорну болдурбас ажылдарны сайзыраңгайжыдар дээн күжениишкиннерни демдеглээн. Ооң-биле чергелештир, ылаңгыя аныяк-өскен болгаш аныяктар ортузунга терроржу идеологияга удур ажылдарны катап эгелээриниң чугулазын демдеглээн – ол адрестиг болгаш бот-тускайлаң болур ужурлуг. «Террорга удур демисел адырында байдалга дорт салдарлыг ниитилел-политиктиг, социал-экономиктиг ажылдарның мониторингизин база экижидер херек» – деп, регионнуң удуртукчузу онзалап демдеглээн.
Видеоконференция таварыштыр эрткен хуралга тус черлерде террорга удур комиссияларның удуртукчулары болур муниципалитеттер удуртукчуларын база дыңнаан. Тываның Баштыңы террорну болдурбазы-биле тус чер бот-башкарылга органнарының ажылын организастаарынга методиктиг болгаш практиктиг дузаны көргүзерин регионнуң террорга удур комиссиязынга дааскан.
