Таңды кожууннуң чурттакчы чону Тываның Чазааның 2024 чылда ажыл-чорудулгазының түңнелдерин сайгарып чугаалашканын ТР-ниң Дээди Хуралының депутады Аян Ширижик дыңнаткан.
– Таңдыга чон-биле ужуражылгалар үезинде Тываның Чазааның 2024 чылда кылып чоруткан ажылының түңнелдери-биле таныжып, чедиишкиннеривисти, келир үеде планнарывысты болгаш кожуунувустуң янзы-бүрү айтырыгларын кады сүмележип чугаалаштывыс.
Ниитизи-биле Тыва Республиканың Чазааның 2024 чылда күжениишкиннерин кожуун бедик үнелээн. Балгазында суурнуң езулуг каасталгазы апарган чаа школа ажыттынган, эмнелге болгаш техникумнуң улуг септелгези база кылдынган. Бо чылын Бай-Хаакта чаа школа болгаш 250 олуттуг Культура ордузунуң тудуу доостур.
Кочетов суурнуң чурттакчыларынга Элегест-Аксынга чедир автооруктуң тудуу удавас эгелээрин база улуг өөрүшкү-биле дыңнаттым. Суурнуң чонунга бо орук кайы-хире херегин билир бис.
Оруктар, харылзаа, чаа спорт залдар тудуу дээш оон-даа өске айтырыгларны база чугаалаштывыс. Шупту айтырыглар демдеглеттинген, Тываның Чазаа-биле кады оларны шиитпирлээрин оралдажыр бис.
ТР-ниң аныяктар херээниң талазы-биле сайыды Субудай Оюнга, яамыларның ажылдакчыларынга болгаш Таңды кожууннуң удуртулгазынга Тываның Чазааның отчеду-биле тодаргай таныжып, чидиг айтырыгларны ажык чугаа хевиринге сайгарып көөр арганы бергени дээш четтирдивис. Чаңгыс чер чурттугларымга идепкейлии, деткимчези дээш база өөрүп четтирдим.
