Улусчу чогаадылга бажыңынга эрткен «Бүгү чүүлдү тиилелге дээш!» телемарафоннуң түңнелдерин үндүрген: 540 000 рубль.
Ада-чурт камгалакчызының хүнүнге тураскааткан тускай шериг операциязының киржикчилерин деткиир ачы-дуза чедирер концертинге тыва эстраданың артистери, Тываның херээженнер эвилелиниң авалары бараалгаан.
Чыгдынган акша-хөреңги-биле дайынчы хөделиишкиннер девискээринде мурнуку одуругда чаныш-сыныш чок албан-хүлээлгезин күүседип турар чаңгыс чер чурттугларывыстың хереглелдерин хандырарынче угландырарын Ниити-российжи улусчу фронтунуң Тывада салбырының күүсекчи комитединиң удуртукчузу, Тывадан шериг албан-хүлээлгелиглерге дуза көргүзер чаңгыс аай штабтың даргазының оралакчызы Саима Далчин дыңнаткан.
Ээлчеглиг ачы-дуза чүъгүн март айның ортан үезинде чорудар. «Бүгү чүүлдү тиилелге дээш!» федералдыг төлевилелдиң чорудуу-биле ачы-дуза чыылдазын база чорудулгазын Ниити-российжи улусчу фронт организастап турарын сагындыраал.
Тускай шериг операциязында киржип турар дайынчыларга ачы-дуза чыыр пунктулар дараазында адресте ажылдап турар: Кызыл хоорай, Тыва эки турачылар кудумчузу, бажың 3, каб 3, харылзажыр телефон дугаары: 8 (39422) 2-10-50; Кызыл партизаннар кудумчузу, бажың 30, каб 106. Ачы-дуза чыылдазынга чурукта айыткан QR-код таварыштыр база киржип болур.
