Кызылдан Донецк Улус Республика биле Курск облазының уунче автомашиналар, мотоциклдер, техниктиг дериг-херекселдер, доңурган инек, хой, аът база сарлык эъди, камгалал херекселдери болгаш өске-даа чугула херек чүүлдерлиг чүък машиналарының автоколонназы шимчеп үнүпкен.
Тывада чурттап чоруур чоннарның чыгган ачы-дуза Шагаа бүдүүзүнде чеде бээр. Тываның Чазааның, Ниити-российжи улусчу фронтунуң регионалдыг күүсекчи комитединиң, Камбы-Лама эргелелиниң, Тыва культура төвүнүң база муниципалдыг чагырга черлериниң деткиишкини база «Бүгү чүүлдү тиилелгеже!» федералдыг төлевилел-биле дузаламчыны чыгган.
Тываның Баштыңы [id360104045|Владислав Ховалыгның] даалгазы езугаар, шериг албан-хүлээлгелиглерге дузаламчы чыыр ажылды чоруткан.
Камбы-Лама эргелели Тыва культура төвүнүң чогаадыкчы ажылдакчылары болгаш Улусчу фронтунуң Тывада салбырының күүсекчи комитединиң удуртукчузу [id446861578|Саима Далчин-биле] кады дайынчыларывыска сөңнү чаңгыс чер чурттугларывыстан чыыры-биле республиканың шупту кожууннарын январь эгезинден эргээн. Бо удаада дайынчыларывыстың чагыы-биле техниктиг дериг-херекселдер чыырынче кол кичээнгейни углап, оон аңгыда тыва эътти, чылыг хептерни база камгалал чүүлдерин чыггаш, чоруткан.
«Мөңгүн» микрорайон девискээринге ажылдап турар тудуг организацияларының төлээлериниң Донецкиде Чаңгыс аай дүүштүрүлге төвүнге дээш саткан автомашиназы автоколонна-биле чеде бээр. Шериг кезектери болгаш тус чер организациялары-биле ис чок читкен дайынчылары дилээр болгаш оларның чоок улузунга дуза кадып ажылдап турар Чаңгыс аай дүүштүрүлге төвүнүң ажылдакчыларынга транспорт дыка херек. Чаңгыс чер чурттугларывыстың дилеглерин дүрген шиитпирлээринге автотранспорт дузалыг болуру чугаажок.
Азербайджан, армян, узбек диаспоралар дайынчыларның чагааны ужудукчу чок аппараттарны чоруткан. «Деткимче» фонд, «Элита» КХН, «ГААО-2» АН, хууда сайгарлыкчы Кудер Балчыырак, «Магистральная-17» бенин кудар станциязы кывар-чаар чүүлдер-биле дузалашкан. Республикада билдингир ыраажы Буян Сеткилдиң эгелээшкини-биле болуп эрткен ачы-буян концертинден чыгдынган акша-хөреңгини бир улуг чүък машиназынга кывар-чаар чүүлдү саткан.
Донецкиге келген ачы-дуза чүъгүн Командирлер чөвүлели хүлээп алгаш, тыва оолдарның дайынчы хүлээлге күүседип турар аңгы-аңгы кезектеринче чагыглар езугаар үлежип апаарын Саима Далчин демдеглээн.
Курск облазынче углаан ийиги чүъктү ТР-ниң Дээди Хуралының депутады Эрес Хуурак хүлээдир. «Амгы үеде тулчуушкуннар чоруп турар Курск облазынче дузалакчым-биле кады аъттанып турарывыс бо. Ужурдукчу чок аппараттар детекторлары, дүне көөр хараалдар дээн ышкаш техниктиг дериг-херекселдерни аңаа чедирер бис – деп, ол дыңнаткан.
ТР-ниң Камбы-Лама эргелелиниң башкылары тускай шериг операциязының девискээринче база кады үнүпкеннер. Ламалар февраль 28-тен март 1 дүнезинче Донецкиде чаңгыс чер чурттуг дайынчыларга мөргүлдер номчуур.
