Тываның чурттакчылары эмчи хыналдазын удаа-дараа эртер апарган

ТР-ниң Кадык камгалал яамызы 2026 чылдың эгезинден бээр республикада 52 муң ажыг кижи диспансеризацияны эрткенин дыңнаткан. Эрткен чылдың ол-ла үезинге деңнээрге, 20 хуу хөй деп санаан.

«Узун болгаш идепкейлиг назын» национал төлевилел езугаар бо шинчилгелерни ыяап-ла медицина камгаладылгазының хуудузу-биле эрттирип турар. Ол хыналдаларның түңнелинде, республиканың чурттакчыларындан 27600 ажыг аарыг кижилерни тодараткан, диспансер хайгааралында 24240 хире кижини алган.

Шинчиткен ниити кижи санындан 11444 кижи профилактиктиг эмчи шинчилгезин эрткен, а улуг улустан 40903 кижи шинчиткен.
1589 кижиге аарыгны бир дугаар тодараткан, шинчилел эртер мурнунда ол кижилер байдалын билбес турган. Колдуунда хан-дамыр эргилдезиниң, чем хайылдырар болгаш тыныш органнарының аарыглары илереттинген.

Диспансер шинчилгезиниң түңнелдери халдавырлыг эвес аарыглардан аарып болурунуң чылдагаанын көргүскен: шын эвес чемненилге (23894 таварылга), шимченгир эвес, олутпай чорук (19113 таварылга), таакпылаары (4274 таварылга).

Ол ышкаш ханы эмчи шинчилеглери база уламчылап турар. Covid-19-тан аарып каапкан 18 хардан өрү назылыг хамаатыларга бо комплекстиг шинчилгени чорудуп, аарыг соонда өске аарыгларны илередиринче ону угландырган. Майның ортан үезинде 6777 кижи, азы чылда планнаанының 42,4 хуузу эмчи шинчилгелерин эрткен.
Өзүп-көвүдээр назы-харлыг хамаатыларның диспансеризациязынче аңгы кичээнгейни салган, бо бүгү талалыг ханы шинчилгени 15816 кижи эрткен.

«Эмнээшкинни эгелээри эң-не үре-түңнелдиг турда аарыгларны эге чадазында илередириниң эң-не чедимчелиг аргазы – профилактиктиг эмчи шинчилгелери болгаш диспансеризация болуп артпышаан. Республиканың чурттакчылары ол шинчилгелерни быжыглаттынган чериниң поликлиникаларынга албан медицина камгаладылгазының полизи-биле халас эртип болур. Профилактиктиг шинчилгелерни доктаамал эртип ап турары кадыкшылды кадагалаарынга болгаш аар аарыгларның тыптырын болдурбазынга дузалаар» – деп, кадык камгалал сайыдының бирги оралакчызы Марианна Куулар демдеглээн.

Тываның Кадык камгалал яамызы диспансеризация болгаш профилактиктиг эмчи шинчилгелери халас дээрзин база катап сагындырган. Хыналданы чурттап турар черинде быжыглаттынган поликлиникага эртип болур.