Тываның чурттакчыларын экологтуг акцияже база катап чалаан

«Бумбатл» бүгү-российжи экологтуг акцияның октябрь 10-да эгелээн дөрткү сезонунче Тываның чурттакчыларын болгаш ажылчын коллективтерин база катап чалаан.

Акцияның кол сорулгазы хевээр арткан – ажыглап каапкан артык саазыннарны эвээжедип, ону эде болбаазырадыр системаны организастаары база чоннуң экологтуг культуразын хевирлээри.

«Вторпроект» компания дараазында адресте саазын аймаан хүлээп турар: Кызыл хоорайның Энергетиктер кудумчузу, б. 1Б, харылзажыр телефону – 89069995588. Понедельниктен субботага чедир 08.00-19.00 шактарда республиканың чурттакчыларын манап турар. Долгашкаш адаар кол сөзү – «БумБатл».

Чаңчыл болу берген экологтуг кампанияның чаа сезонунга идепкейлиг киржир кылдыр күүсекчи эрге-чагырга болгаш тус чер бот-башкарылга органнарын, хөй-ниити организацияларын, школачыларны, сургуулдарны, уруглар садтарының кижизидикчилерин база күзелдиг кижилерни чалап турар. Октябрьның 10-дан ноябрь 2-ге чедир коллективтиг чагыгларны хүлээр. Октябрьның 10-дан ноябрьның 15-ке чедир хууда бирги чер дээш мөөрейлежип болур.

Акция киржикчилери https://бумбатл.рф сайтта хууда кабинединге бүрүткедип алыр. Хүлээп алыышкын пунктузунга саазынарын чыып, дужаагаш, ону бадыткаан актыны алгаш, шөлчүгеште хууда кабинединче кииргеш, киржикчиниң чурагайлыг сертификадын алыр.

Акция үезинде «ВКонтакте» база «Одноклассники» социал четкилерге #БУМБАТЛ база #нацпроектэкология демдекти идепкейлиг салыры чугула.

«Экология» национал төлевилелди деткээн #БумБатл акция Россияда дөрт дугаар эртип турар. Ооң ачызында 2024 чылда кадыг боктарның 60 хире хуузун болбаазырадып чорудары планнаттынган. Акция Бойдус яамызының, Чырыдыышкын яамызының, Өөредилге яамызының, ол ышкаш российжи улуг компанияларның, хөй-ниити организацияларының, эки турачылар каттыжыышкыннарының деткиишкини-биле эртер.

Эрткен чылын кампания үезинде макулатура чыылдазынга Тываның булуңнарындан 11 муң хире кижи катчып, 18 тонна 308 кил саазынны чыггаш, 300 ажыг улуг ыяштарны ужуруп, кезеринден камгалаан деп, экологтар түңнээнин сагындыраал.