Тываның Баштыңы Владислав Ховалыг ажыл-агый аайы-биле Луганск Улус Республикага чорааш, Луганск Улус Республиканың Свердловск муниципалдыг округтуң Баштыңы Андрей Сухачев-биле кады Червонопартизанск хоорайда 15 дугаар «Спутник» ясли-садта үндезин септелге ажылдарын хынааннар.
Россияның шупту регионнарының чаа девискээрлерге чорудуп турары ажылдарының бир кезээ кылдыр Тываның деткимчези-биле школа назыны четпээн уруглар албан чериниң үндезин септелгезин чорудуп турар. Бистиң республиканың киржилгези-биле 1957 чылда туткан яслиде чаа котельнаяны тургузуп, одалга системазын солуп турар. Бо күзүн чаартынган оран-саваның эжиктери тус черниң 57 уруунга ажыттынар.
–Бистиң үлүг-хуувусту чон-даа, тус черниң эрге-чагыргазы-даа үнелеп турары эки-дир – деп, Владислав Ховалыг демдеглээш, свердловчуларга Тыва ам-даа дузалажырын чугаалаан.
Эрткен чылын Тываның күжү-биле Луганск Улус Республикада ниити өөредилге школазының спорт залы септеттингенин сагындыраал.
