Тываның Баштыңы Владислав Ховалыг дүүн республиканың девискээринде алды школаның (Кызыл кожууннуң Сукпак суурунда Борбак-оол Араптан аттыг школазы, Чеди-Хөлдүң Хову-Аксында, Тес-Хемниң Чыргаландыда, Сүт-Хөлдүң Бора-Тайгада, Барыын-Хемчиктиң Аксы-Барлык база Бай-Тайганың Кызыл-Даг суурунда өөредилге черлери) үндезин септелгези эгелээнин бодунуң блогунда бижээн. Тудуг ажылдарының керээзи ниитизи-биле 300 сая рубль чеде бээр.
– Кызыл-Даг суурнуң школазында бузар ажылдар эгелей берген. Шупту школалар өөредилге ажыл-чорудулгазын өске оран-саваларже көжүрген. Кожууннарның чагырга даргаларынга херек апарган үелерде өөреникчилерни школалардан аргыштырар ажылды организастаарын даастым – деп, Тываның Баштыңы демдеглээн.
Ол ышкаш харыысалгалыг албан черлери тудуг объектилеринге кураторларны тодарадыр.
– Септелге ажылдары чаа-ла эгелээн-даа болза, апрель айның ортан үезинде школаларның дериг-херекселдеринге хамаарыштыр чагыгларны тургузуп, ону чарладырын даастым. Оон аңгыда Балгазынның агроүлетпүр техникуму үндезин септелгеге белеткенип турарлар, оларның өөредилге корпузун болгаш хөй-ниити чуртталга бажыңнарының ийи корпузунуң септелгезин «Аныяктар болгаш уруглар» национал төлевилелдиң «Профессионалитет» федералдыг төлевилел езугаар кылыр – деп, Владислав Ховалыг түңнээн.
