Тываның Чазаа 2023 чылда дужаап кирериниң кампаниязында тускай сорулгалыг кадрлар чагыын киирген. Тываның Баштыңы Владислав Ховалыг чогуур айтыышкынга атты салган.
Ортумак болгаш дээди профессионал өөредилге программазы-биле тускай сорулгалыг өөренир кордакчылар мөөрейин июль 1-ге чедир организастаарын ТР-ниң Өөредилге яамызынга база муниципалитеттерге онааган.
Шилилде эрткен кижи-биле керээни август 1-ге чедир чарар. Ол келир үениң студентизинге халас өөредилгени, доозуптарга – тускай чагыгга киришкен организацияга ажылдаар магадылалды бээр.
Тыва дээди болгаш ортумак профессионал өөредилге черлеринге, ооң санында региондан дашкаар черлерге, тускай сорулгалыг олуттарже шупту 472 олутту чагаан. Ооң көвей кезии 427-зи – дээди өөредилге черлериниң олуттары деп, республиканың Өөредилге яамызы дыңнаткан.
55 угланыышкынга мергежил чедип алыр чагыг кирген. Тываның ажыл берикчилери – кадык камгалал черлеринге 227 эмчи мергежил эң херек. Ылаңгыя эмнээшкин херээниң мергежилдиглери, акушерлер, уруглар, херээженнер, диш эмчилери, анестезиологтар республикада чедишпес.
Өөредилге адыры 72 ажылдакчыга хереглелдиг ийиги чер. Физика, математика, информатика, орус, даштыкы база тыва дылдар, төөгү болгаш ниитилел билиглери, химия болгаш биология башкыларынга хереглел улуг.
Уран чүүл болгаш культура адыры 49 мергежилдигге – хореография, хөгжүм, театр дээн ышкаш угланыышкыннарга кадрларны чагаан. Чүгле республика филармониязы 16 ажылдакчы хереглеп турарын айыткан, ооң санында дирижердан эгелээш, баянистер, пианистер, скрипачылар, виолончелистер.
Владислав Ховалыг кадрлар чагыын сайгарып чугаалашкан соонда, 2023 чылда өөредилгезин дооскан аныяк специалистерни ноябрь 1-ге чедир ажыл-биле хандырар даалганы яамылар болгаш ведомстволар, кожуун чагырга удуртукчуларынга берген.
