Тываның Баштыңы Владислав Ховалыг Москвага ажыл-агыйжы сургакчылаашкын үезинде республиканың эчис сорулгалыг орук төлевилелдерин боттандырары-биле ажылдап турар.

РФ-тиң Чазааның даргазының бирги оралакчызы Денис Мантуровтуң октябрьда эрттирген хуралының түңнели-биле даалгалар протоколунда регионнуң орук четкизин эки байдалче киирериниң, ол ышкаш Тываның девискээрин таварты Моол болгаш Кыдатче транспорт оруунуң төлевилелдерин боттандырарының айтырыглары киргенин сагындыраал. Республиканың удуртулгазының амгы үеде сорулгазы – регионалдыг болгаш федералдыг албан черлеринге идепкейлиг ажылдааш, оларны боттандырарын хандырары.

Тываның Баштыңы социал четкилерде бодунуң блогунда Россияның транспорт сайыдының оралакчызы Виктор Тимофеев биле Росавтооруктуң удуртукчузу Роман Новиков-биле делегей чергелиг транспорт коридорун тургузарынга хамаарышкан айтырыгларны сайгарып чугаалашканын дыңнаткан.

Ылаңгыя федералдыг албан черлериниң удуртукчулары-биле кады Тываның Баштыңы “Ак-Довурак – Абаза” автооруунуң септелгезин акшаландырарының аргаларын ажылдап эгелээн. Регионнар аразының 200 километр узун участогун таарымчалыг байдалче кииреринге, ол ышкаш он көвүрүгнү септээринге сес миллиард хире рубль херек.

«Келир чылын хөй талалыг ажылдап эгелээр Моол-биле кызыгаарда Хандагайты эрттирилге пунктузунче “Ак-Довурак – Абаза” оруу чүък сөөртүкчүлеринге таарымчалыг» – деп, Владислав Ховалыг демдеглээн.

“Ак-Довурак – Абаза” автоорук Тываны Хакасия-биле тудуштурар чаңгыс орук болур. Чылдың-на үер үезинде орукту суг үреп кааптарындан, чолаачылар орукту оюп чорааш хөй үени чидирер. Орук дургаар таварыжыр хемнер-суглар, бедик арттар ооң септелгезин элээн бергедедип турар.

Республиканың хөгжүлдезинге онза ужур-дузалыг өске-даа орук төлевилелдерин база чугаалашкан. Ынчап кээрге, аңаа орук шимчээшкини көвүдээри-биле холбаштыр, Р-257 федералдыг оруктуң Абакан биле Кызыл аразында 17 участоктарынга немелде дилиндектерни кылырын база көрүп турар.

Оон аңгыда республикада Р-257 “Енисей” автооруктуң Кызыл биле Чадаана аразында үш участогун септээри негеттинип келген. Тываның Баштыңы келир чылын ол орукту таарымчалыг байдалче кииреринге акшаландырыышкынны алыр дээш ажылдап турар.