«Чаңгыс демниг Россия» партияның даргазы Дмитрий Медведевтиң чарлааны партийжи эгелээшкиннеринге даянгаш, Тывада партияның регионалдыг салбырының секретары Владислав Ховалыг партийжи улусчу программаны чаартыры-биле чурттакчыларның дилээнге даянып, республиканың чаа программазын ажылдап кылыр ажылдар эгелээнин дыңнаткан.
«Партияның узун хуусаалыг эчис сорулганы ажылдап кылыр хүлээлгезин деткип, Тываның хөгжүлдезиниң чаа улусчу программазын ажылдап кылыр улуг ажылдарны эгелеп тур бис. Ынчангаш республиканың эксперттер бөлүүнче хоочуннар, хөй-ниити төлээлери, аныяк лидерлер база тускай шериг операциязының маадырлары кирер. Оларның арга-дуржулгазы-биле адыр тускай мергежилдиглериниң билиг мергежили стратегтиг документиниң таваан тургузар» – деп, Тываның Баштыңы Владислав Ховалыг ол улуг хемчээлдиг ажыл эгелээнин дыңнаткан.
Партияның даргазы Дмитрий Медведев эксперт бөлүү-биле ужуражылга үезинде, «Чаңгыс демниг Россияның» чаа улусчу программазын ажылдап кылыры чурттакчыларның санал-оналдарының болгаш дилеглериниң төнчү шиитпири болур ужурлуг деп демдеглээн.
«Улусчу программа удур-дедир харылзааның түңнели болур ужурлуг. Ол бистиң партиявыска хүннүң-не кээп турар. Кижилер хүннүң-не менче, силерже (депутаттар болгаш хөй-ниити ажылдакчыларынче), дыка хөй өске-даа кижилерже бижип турар. Президентиже, күрүнениң баштыңынче кылдыр кезээде бижип турарлар. Оларның санал-оналдарын таптыг өөренип көөр херек. Бир эвес калбаа-биле шиитпирлээр нарын айтырыглар бар болза, оларны өөренип көргеш, программаже киирер ужурлуг. Улусчу программаның кол утказы ол болганда, ол чөптүг болур» – деп, Дмитрий Медведев чугаалаан.
2021 чылда Тыва чурттакчы чоннуң нарын айтырыгларын шиитпирлээринче угланган республика чергелиг программалар болгаш төлевилелдерниң үндезинин тургускан бодунуң Улусчу программазын ажылдап кылган. Ында көдээ суурларны хөгжүдеринче, энергетиканы чаартырынче, оруктарны экижидеринче болгаш социал адырже онза кичээнгейни салган.
Беш чыл дургузунда көдээ оруктар септелгези болгаш тудуунга, Кызыл хоорайның кудумчу четкизин эде чаартырынга улуг хемчээлдиг ажылдарны кылып, республика бюджединиң акша-хөреңгизи-биле дыка хөй эргижирээн социал объектилерни септеп, кудуктарны тудуп, кожууннар аразында пассажирлер аргыштырылгазын организастаан. Өскүс уругларга чүс-чүс чаа бажыңны тудуп, электри энергиязын киирип, хүлээткен.
Республика чурттакчыларның дилеглери стоматология албанын сайзыраңгайжыдар база дүрген эмчи дузазын төпчүдер республика программазын хүлээп алырынга үндезин болган. «Росчетки. Сибирь. Тываэнерго» бүдүрүлге хөй санныг хереглекчилерниң дилээ-биле бо чылын Вавилин ээтпээнде болгаш өске-даа садчы ниитилежилгелерде, ол ышкаш ыраккы суурларда электри четкилерин чаартыр ажылдарны эгелээр.
Владислав Ховалыг ооң мурнунда регионалдыг Улусчу программаның сорулгалары 95 хуу күүсеттингенин дыңнаткан. Чаа программа чаа спортчу объектилерни, электри энергиязын база амгы үениң инфратургузуун мурнады хөгжүдеринче угланган.
