Тывадан ийи бүдүрүлге – «Туваавтотранс» биле «Ресурсы» кызыгаарлаан харыысалгалыг ниитилелдер «Тулган барааннар болгаш ачы-дузалар – ГЕММА 2024» деп билдингир делегей мөөрейиниң шилилделиг кезээн чедиишкинниг эрткен. Чылдың-на эрттирип турар мөөрейниң 23 дугаар шилилде чадазының тиилекчилери «ГЕММА» деп алдын медальдарны алырын чарлаан.
Тываның Баштыңы [id360104045|Владислав Ховалыгның] эгелээшкини-биле пассажирлер аргыштырылгазының системазын эде чаартыр дээш 2022 чылдың августа «Туваавтотранс» кызыгаарлаан харыысалгалыг ниитилел тургустунган. Ол регион девискээринде автобустуг пассажирлер аргыштырылгазының адырында бедик шынарлыг ачы-дузазы дээш “Ачы-дузалар” номинацияга тиилээн.
«Туваавтотранс» бүдүрүлге бедик шынарлыг ачы-дузазы дээш чаңгыс эвес катап шаңналче кирген. Эрткен чылын ол-ла делегей чергелиг мөөрейниң тиилекчилериниң бирээзи болган. Амгы үеде компания Кызылдың девискээринде база Тываның муниципалдыг тургузуглар аразында пассажирлерни аргыштырып турар.
«Ресурсы» кызыгаарлаан харыысалгалыг ниитилел – тудугнуң таваанга база ханаларынга ажыглаар блоктарны, ол ышкаш бетонну бүдүрүп турар. 2015 чылда тургустунган бүдүрүлге Тывада тудуг материалдарының рыногунда кол черни ээлеп турарларның бирээзи. Компания бетон блоктар продукциязын киириштиргеш, «Чемге хамаарышпас хереглелдиг база бүдүрүлге-техниктиг ажыглалдыг продукция» категорияга тергиин адын база катап бадыткаан.
Россия болгаш Беларусьтуң экономиказының аңгы-аңгы адырларында ажылдап турар 70 ажыг компания 2024 чылда мөөрейниң шилилде кезээнге тиилээш, «ГЕММА» алдын медальдарны чаалап алган. Ол бүдүрүлгелер хамаарышпас экспертизаны эрткеш, боттарының чижилгелиин бадыткаан. Шилилде турнуң тиилекчилери 2025 чылдың апрельде болур конкурстуң түңнел чадазында боттарының регионнарын төлээлээр.
Төлевилелдиң хамаарышпас эксперт үнелелиниң кол негелделери болза, хереглекчилерниң амгы үеде сонуургалдарынга дүүштүр, делегей рыногунда шынар талазы-биле сөөлгү чедиишкиннерни ажыглаары, бизнес ажыл-чорудулгазын организастаарын үргүлчү сайзырадып, деңнелин көдүрери болур.
2022 чылдан бээр Россияда, бо чылдан эгелеп Беларусь Республикада эрттирип турар «Тулган барааннар болгаш ачы-дузалар – ГЕММА» мөөрей амгы үениң технологияларын ажыглап база бедик шынарлыг продукция бүдүрүп база ачы-дузалар көргүзүп турар кедилиг болгаш чижип шыдаар бүдүрүлгелерни деткиир угланыышкынныг. Төлевилел делегейниң 64 чурттарын хаара туткан, база Кыдат биле Бразилияда албан езузунуң төлээлерлиг.
Глава Тувы проинспектировал строительство жилищных комплексов в Кызылской агломерации
Сегодня Глава Тувы Владислав Ховалыг проинспектировал строительство социальной инфраструктуры и жилых комплексов в рамках масштабных инвестиционных проектов в Кызылской агломерации.