Бай-Тайга кожууннуң Тээли сумузунда Н.Өлзей-оол аттыг культура одаанга «Орус географтыг ниитилел» бүгү-российжи хөй-ниити организациязының кежигүнү, Тывада баштайгы «Дээди категорияның үдекчизи” деп шынзылганың эдилекчизи, “Чиңзе” кызыгаарлаан харыысалгалыг ниитилелдиң чиңгине директору Артцалам Хертектиң хууда чурук делгелгезиниң ажыдыышкыны болуп эрткенин чагырга чери дыңнаткан.
Делгелгени сонуургап келгеннер арбын болган. Артцалам Хертек бичии чажындан Кара-Хөл сумузунга өгбелериниң малын малдажып, ажыл-ижинге дузалажып өскен болгаш төрээн чериниң бойдузун аажок сонуургап, чарашсынар турган. Чер чуртунуң чурумалдыг черлерин 1980 чылдардан эгелеп тырттырып эгелээн. Турисчи ажылының аайы-биле барып четкен булуңнарын чурукка тырттырып алыры оон улуг сонуургалы болу берген.
Бай-Тайга кожууннуң Төлээлекчилер хуралының даргазының оралакчызы Айлан Шожунчап, Бай-Тайга кожуун чагырга даргазының социал-политика талазы-биле оралакчызы Аяна Сарыглар, Тээли суму баштыңының оралакчызы, муниципалдыг адырның хоочуну Сергей Салчак, культура эргелелиниң даргазы Сайын Күжүгет, кожууннуң төп ном саңының мурнундан хоочун библиотекарь Наталья Салчак олар оран-чуртунуң каас-шиниин өскелерге бир онзагай хевир-биле дамчыдып чоруурунга чоргаарланып, Артцалам Хертекке байыр чедиргеннер.
Н.Өлзей-оол аттыг культура одааның ажылдакчылары байырлалды улам каас-шиник болдуруп, хөгүмнүг байырны чыылганнарга бараалгатканнар.
Дээди категорияның үдекчизи төрээн Тывазының каас-чараш чурумалдыг черлерин болгаш онзагай булуңнарын чурукка тырттырып, Тываның туризм адырының сайзыралынга улуг үлүг-хууну киирип чоруур кижилерниң бирээзи.
