ТР-ниң Дээди Хуралының алдыгы сессиязының бирги ээлчеглиг хуралында депутаттары 2025 чылда база планныг дараазында ийи чылда республика бюджедин бирги номчулгазында хүлээп алган.
Республика бюджеди социал угланыышкынныг хевээр арткан, ында тускай шериг операциязын деткииринче угланган хемчеглер база кирген.
«2025 чылда база планныг 2026 болгаш 2027 чылдарда республика бюджединиң дугайында» хоойлу төлевилелинге ажык дыңнаашкыннар үезинде Тываның саң-хөө сайыды Орлан Достай 2024 чылдың төнчүзүнде каттышкан регионалдыг продуктунуң хемчээли 124 хире млрд рубль чедип, эрткен чылдың деңнелинден 4,7 хуу өзүлделиг болурун дыңнаткан.
Тыва Республиканың социал-экономиктиг хөгжүлдезиниң тускай программазының күүселдезин 2025-2030 чылдарда акшаландырып, үлетпүр, көдээ ажыл-агый, туризм, сайгарлыкчы чорук адырында төлевилелдерни аңгы-аңгы аргалар-биле деткииринге алды млрд рубль түңнүг акша федералдыг бюджеттен тускайлаттынар.
2025 чылда республиканың каттышкан бюджединиң үндүрүг база үндүрүгге хамаарышпас орулгалары 2024 чылга деңнээрге 28 хуу хөй болуп, 18862 сая рубль чедер. Президентиниң Чарлыы езугаар национал сорулгаларның күүселдези – 2030-2036 чылдарда мурнады боттандырар угланыышкын болуп артар.
ТР-ниң Үндезин хоойлуларынче «Чер дугайында» болгаш «ТР-ниң Чазааның дугайында» киирген эдилгелерни хүлээп алган.
Тускай шериг операциязының киржикчилеринге чаа деткимче хемчээн чүүлдүг деп көргеш, 2024 база 2025 чылдарда транспорт үндүрүүн төлээр талазы-биле чиигелдени киирген.
Сессия үезинде ниитизи-биле 86 айтырыгны депутаттар көрген.
