Хакасияда чурттап, ажылдап, өөренип турар тывалар Абаканда Н.Г. Доможаков аттыг национал төп ном саңынга бүгү-российжи «Библиодүн» деп акцияга киришкенин “Энерел” чаңгыс чер чурттугларның хөй-ниити организациязы дыңнаткан.
Ном саңы он үш шөлчүгештиг “Хакасияның дээриниң адаанда: чаңгыс демниң шокар хээлери” деп этнокультурлуг программаны белеткээн.
Россияда чоннарның чаңгыс деминиң чылынга тураскааткан хемчегге чаңгыс чер чурттугларывыс аалчыларын “Тываның найыралының одаанда: кожазы-биле таныжылга” шөлчүгешке хүлээп турган. Олар буга шыдыраага, кажыкка ойнап, дошка кылыр өөредиглиг кичээлге киришкен.
Ол ышкаш Тываның культуразын болгаш төөгүзүн таныштырган ном делгелгезин, шеверлерниң кылган суй белектерин бараалгаткан.
