ТР-ниң Дээди Хуралының депутаттары “Тываның маадырлары” деп чаа кадрлар төлевилелин деткип, тускай шериг операциязының киржикчилери болгаш хоочуннары-биле ужурашкан.
Героитувы.рф (героитувы.рф/) деп сайт албан езузу-биле ажылдап эгелээн, аңаа кандыг-даа кижи программаның дугайында долу медээлерни тып ап, эң-не кол чүүл – аңаа киржир дугайында билдириишкинни киирип болур. Сайтта онлайн-тестээшкин болгаш ырактан бүрүткел эртер арга тургустунган. Амгы тускай шериг операциязының девискээринде тулчуп турар шериг албан-хүлээлгелиглерге тускай хүннерни аңгылаан.
Ужуражылгага ТР-ниң Чазак Даргазының оралакчызының хүлээлгезин күүседип турар Айдыс Сынаа, “Ада-чурттуң камгалакчылары” күрүне фондузунуң Тывада салбырының удуртукчузу Мерген Кызыл-оол, Тываның күрүне университединиң төлээлери киришкен.
Тускай шериг операциязының киржикчилериниң болгаш хоочуннарының аразында чаа төлевилелге киржир күзелдиглер хөй болган.
Тываның Баштыңы Күрүне эргелеп-башкарылгазының дээди школазының профессионал эде белеткелдиң өөредилге программазын эртер шериг албан-хүлээлгелиглерниң даңзызы июнь айда хевирлеттине берген турарын социал четкиде бодунуң блогунда медеглээн. Өөредилге сентябрь 1-де эгелээр.
[id360104045|Владислав Ховалыг] төлевилелдиң ажылчын бөлүүнге доозукчуларның моон соңгааргы ажылга тургустунарының талазы-биле айтырыгларны сайгарып көргеш, «өөредилге – ажылга киирери» системаны тургузар даалганы берген.
Тываның Чазаа бо хүннерде регионалдыг программа күүселдези-биле өөренир күзелдиг хамаатыларны шилиириниң чурумун бадылаан. Шилилге ийи чадага эртер.
Бирги чадада – төлевилелдиң албан езузунуң сайтызынга бүрүткедир. Бүрүткел үезинде хууда кабинетти ажыдып, анкетаны долдуруп, бадыткал документилерниң электроннуг бижиктерин кожуп, чогаадыгны бижиир.
Ийиги чадада – айтырыгларга харыылаар. Ону онлайн хевир-биле эрттирер, бир эвес киржикчиниң техниктиг аргалары чок болза, тускай шериг операциязының киржикчилерин деткиир «Ада-чурттуң камгалакчылары» күрүне фондузунуң Тыва Республикада салбырынга тестилерни дужаап болур. Тускай шериг операциязының девискээринде шериг албан-хүлээлгелиг кижилер хууда кабинединге онлайн айтырыг-харыыларны эртип шыдавазын дыңнадырын айыткан.
Бүрүткеткеш, шылгалданы эрткен соонда, немелде шылгалда кылдыр чугаалажылганы эртер чадавас. Удуртуп-башкарар арга-дуржулгазы, арга-шинээ болгаш шериг ачы-хавыяазы эки түңнелдерлиг киржикчилерни өөредилгеге чалаар.
«Тываның маадырлары» төлевилел – Владимир Путинниң эрткен чылын тускай операцияларның хоочуннарга болгаш амгы үеде дайынчыларынга чарлаан «Маадырларның үези» деп президентиниң кадрлар программазының регионалдыг хевири болур. Тываның Баштыңы Владислав Ховалыг регионалдыг программаның эгелээрин Дээди Хуралынга Айыткалынга дыңнаткан. Ооң чугаазы-биле алырга, тускай шериг операциязының киржикчилерин болгаш хоочуннарын деткип, оларга чаа сорулгаларны тыварынга, боттарының арга-шинээн ажыдарынга дузалажыры – кол сорулга.
Төлевилелче шилиттингеннер “Күрүне эргелеп-башкарылгазының дээди школазы” институду-биле Тываның күрүне университединге профессионал эде белеткелдиң өөредилге программазынга өөренир. Төлевилелдиң киржикчилери өөредилгезин доозупкаш, эде белеткелдиң дипломун алыр.
