«Тываның маадырлары» регионалдыг программаны сайгарып чугаалашкан

Тываның Чазаанга тускай шериг операциязының киржикчилерин эде өөредир сорулга-биле ажылдап эгелээр «Тываның маадырлары» регионалдыг программаны таныштырган.

Тываның Баштыңы Владислав Ховалыгның Тываның Дээди Хуралынга Айыткалының күүселдези-биле, «Маадырларның үези» деп президент программазынга дөмейлештир ажылдап кылган «Тываның маадырлары» регионалдыг программаның төнчү хевирин Хөй-ниити чөвүлелиниң хуралынга сайгарып көрген.

Күрүне болгаш муниципалдыг эрге-чагырга органнарынга болгаш өске-даа организацияларга дараазында ажылдаарынга тускай шериг операциязының хоочуннарының болгаш киржикчилериниң аразындан бедик мергежилдиг, шыырак кадрларны белеткээр программаны мартта эгелээрин планнаан.

Эрткен чылын Россияның Президентизи Владимир Владимирович Путин Федералдыг Хуралга Айыткалында тускай операцияларның хоочуннарга болгаш амгы үеде дайынчыларынга “Маадырларның үези” деп тускай кадрлар программазы ажылдап эгелээнин [id360104045|Владислав Ховалыг] сагындырган.

Президент 2024 чылдың декабрьда «Чаңгыс демниг Россия» партияның 22-ги съездизинге Россияның шупту регионнарынга «Маадырларның үези» деп федералдыг программаны ажылдадырын саналдаан. Президент тускай шериг операциязының киржикчилери чурттуң кадрлар курлавырларының үндезинин тургузар ужурлуг деп демдеглээн.

– «Тываның маадырлары» регионалдыг программа — тускай шериг операциязының киржикчилеринге болгаш хоочуннарынга бистиң командавыстың кежигүнү болур арга-дыр. Программаны тускай шериг операциязының киржикчилерин болгаш хоочуннарын деткип, оларга чаа аргаларны тып, арга-шинээн ажыдып, аныяк салгалга үлегер-чижек болурунга дузалаар дээш тургускан – деп, Владислав Ховалыг чугаалаан.

Программаны ажылдап кылыр болгаш боттандырар талазы-биле оргкомитеттиң удуртукчузу, Тыва Республиканың Чазааның Даргазының оралакчызы [id652022240|Айдын Чюдюк] программаның шугуму-биле өөренир кижилерни шилиириниң чурумун бадылаарын Чөвүлел кежигүннеринге саналдаан.

Авторлар документини ажылдап кылырда, Россия Федерациязының Президентизиниң эгелээни «Маадырларның үези» деп федералдыг программаның үндезиннерин удуртулгага алганын Чазак Даргазының оралакчызы онзалап демдеглээн. Документини тургузар бүгү ажылдарны федералдыг кураторларның удуртулгазы-биле база оларның сүмези-биле чоруткан.

Тываның күрүне университеди-биле “Күрүне эргелеп-башкарылгазының дээди школазы” институду кады өөредилге программазынче хүлээр кижилерни шилиирин элээн каш чадаларда эрттирер. Март эгезинде сайтыга бодун бүрүткедири-биле бирги чада эгелээр. Бүрүткелди эгелээрин сайтыга немей чарлаптар. Ийиги чадазында, кордакчы кижи сайтыда хууда арнынга тестини эртер.

Оргкомитет төлевилел киржикчилеринге негелделерни ажылдап кылырда, регионалдыг онзагайларны барымдаалап, программага ортумак тускай эртемниг шериг албан-хүлээлгелиглерниң киржир аргазын киргенин Айдын Чюдюк демдеглээн.

Ортумак тускай азы дээди эртемниг, тускай шериг операциязының амгы киржикчилери азы дайын хөделиишкиннериниң хоочуннары шилилгеге киржип болур. Шилилдени эрткен кижилер профессионал эде белеткел программазынга өөренир. Өөредилгезин доозуптарга, оларга профессионал эде белеткелди эрткениниң дипломун тыпсыр.

Тускай шериг операциязының девискээринде амгы үеде тулчуп чоруур албан-хүлээлгелиглерге шилилге чорударының тускай хуусааларын болгаш чурумун көрген.

«Ада-чурттуң камгалакчылары» күрүне фондузунуң регионда салбырынга боду тестини эртип болурун дыңнаткан билдириишкинни саазынга бижээш киирип болурун чурумда айыткан.

Хөй-ниити чөвүлелиниң кежигүннери программаның ылгавыр демдээн база өөредилгеге киржир кижилерни шилиириниң чурумун бадылаан.

– Чүгле республика болгаш муниципалдыг деңнелдиң удуртукчуларын эвес, а даг-болбаазырадылга бүдүрүлгелеринге болгаш экономиканың өске-даа адырларынга ажылдаар арга-дуржулгалыг тускай мергежилдиглерни белеткээр бис – деп, Владислав Ховалыг программаның сөөлгү хевирин сайгарып көрген соонда, социал четкилерде бодунуң арынында мынча деп бижээн.

#Тывачазак #Тускайшеригоперациязы #ТМГМедээлер #Тыва #Тывамедээ #Тывадыл #Тывамедиагрупп #Тува