«Россияның почтазы» хостуг ажылчын олуттарны «Тываның маадырлары» төлевилелдиң киржикчилеринге саналдаан бир дугаар ажыл берикчизи болган.
Тускай шериг операциязының хоочуннарын болгаш киржикчилерин албан-хүлээлгезин дооскан соонда ажылче хүлээп алырынга беленин “Россияның почтазы” акционерлиг ниитилел илередип, чүгле республиканың төвү Кызылга эвес, а бүдүн регионга ажылчын олуттарны саналдаан. Бо чүүл хоочуннарга бажыңынче чанып келгеш, ниитилелче киреринге дузалаар.
Тываның Чазаанга «Тываның маадырлары» программа күүселдезин сайгарып тура, ТР-ниң федералдыг почта эргелелиниң удуртулгазы-биле бо айтырыгга хамаарыштыр ужуражылга эрткен.
“Россияның почтазы” акционерлиг ниитилелдиӊ Тывада эргелелиниң директору Вероника Кара-оол база «Тываның маадырлары» регионалдыг программаның Хөй-ниити чөвүлелиниң секретары, Тываның Чазааның иштики политика департаментизиниң начальниги Шолбан Хомушкунуң киржилгези-биле болган ужуражылгага тускай шериг операциязының хоочуннарынга биле амгы киржикчилеринге сүмелээн хостуг олуттар дугайында чаа медээлерни акционерлиг ниитилелдиң талазындан доктаамал берип турарын дугурушкан.
Россияның почта салбырларынга ажылче хаара тудар аргалар чүгле «Тываның маадырлары» программаның тиилекчилеринге эвес, а ооң шупту киржикчилеринге ажык болуру көрдүнген.
«Киржикчилерге шыңгыы негелделер чок, дээди азы тускай эртемниг болуру-ла чедер. Өске аргаларны база көрүп болур бис, өөредилге үезинде база ажылдадып болур. Эге дээрезинде көдээ суурларда почта салбырларының удуртукчузу хостуг олуттарны саналдаанывыс бо, ынчалза-даа келир үеде “Тываның маадырлары” төлевилелдерниң ол даңзызын калбартырынга белен бис – деп, Вероника Кара-оол тайылбырлаан.
Күзелдиг кордакчылар “Россияның почтазы” акционерлиг ниитилелдиӊ албан езузунуң сайтызында салган саналдарны көрүп азы тус черниң федералдыг почта албан чериниң кадрлар килдизинче чедип, ажылга тургустунар аргалар дугайында тодаргай медээни ап болур.
«Тываның маадырлары» регионалдыг төлевилел Тываның Баштыңы Владислав Ховалыгның саналы-биле эгелээн. Россияның Президентизи Владимир Путинниң даалгазы-биле РАНХиГС-тың Күрүне эргелеп-башкарылгазының дээди школазының боттандырып турары «Маадырларның үези» федералдыг төлевилелдиң тус черде ындыг программазы болур. Регионалдыг программаның бир онзагай чүүлү – ортумак профессионал эртемниг кижилерниң аңаа киржири.
Шолбан Хомушку программаның сорулгазы – тускай шериг операциязының киржикчилерин болгаш хоочуннарын деткиири, оларга амыдыралдың чаа сорулгаларын тургузарынга болгаш арга-шинээн сайзырадырынга дузалажыры дээрзин сагындырган.
«Тываның маадырлары» программа шупту киржикчилерни күрүне албан черлеринге, күүсекчи эрге-чагырга, тус чер бот-башкарылга органнарынга база өске-даа федералдыг болгаш республика структураларынга ажылче хаара тудар. «Төлевилелдиң баштайгы партнеру “Россияның почтазы” акционерлиг ниитилел республикада 20 хостуг олутту саналдаан» – деп, Шолбан Хомушку тайылбырлаан.
Март 6-да эгелээн программаның бирги чадазында, кадрлар төлевилелинге киржир дээш 154 киржикчи бүрүткеткен, ооң иштинде тускай шериг операциязының амгы үеде 103 киржикчизи бар. Бүрүткел апрель 9-ка чедир уламчылаар, ооң соонда апрель 10-дан июнь 30-ге чедир киржикчилер-биле хыналда болгаш чугаалажылга кезээ болур.
