Республикада шээр малдың оолдаашкынының үезинде 322,6 муң хураганны болгаш анайны алган. Тываның Баштыңы Владислав Ховалыг-биле ээлчеглиг аппарат хуралында мал оолдаашкынының түңнелдерин үндүрген.
ТР-ниң Көдээ ажыл-агый болгаш аъш-чем яамызының дыңнатканы-биле алырга, планнаттынганындан 7,3 хуу хөйге малдың чаш төлүн алган. Төрүүр 100 башка онааштыр 75 баш анай-хураган, азы пландан беш баш хөй болган. Ындыг болзажок, чүс төрүүр малдан 80 баш чаш төлдү алыр нормадан эвээш болган.
Ындыг-даа болза, яамының тускай мергежилдиглери мал оолдаашкынының кампаниязы эки эрткен деп санап турар. Чымчак болгаш эвээш харлыг кыш эрткенинден, база чем курлавырлары четчир болганындан, мал бажынга когарал болбаан. Бүдүрүкчү кошкарларның болгаш хуналарның эвээш болганындан малдың чаш төлүнүң баш саны эвээш болган деп, малчыннар тайылбырлаан. Чартык сая төрүүр мал бажынга онааштыр чүгле 3714, азы эдериштирилгени хандырар хемчээлден ийи катап эвээш бүдүрүкчү мал бар.
Мал оолдаашкынының кампаниязы хой болгаш өшкү ажыл-агыйларында доозулган-даа болза, мыйыстыг бода болгаш чылгы мал ажыл-агыйларында мал оолдаашкыны ам-даа уламчылап турар. Майның сөөлгү неделязының сан-чурагайындан алырга, шупту мал ажыл-агыйларында 52,6 муң бызаа камгалап алдынган, азы планның 77,4 хуузу, ол дээрге 68 муң баш. 30,6 муң баш кулун алыр пландан бо хүнге чедир 25,8 муң, азы 84,1 хуу чаш малды алган. Улуг малдың оолдаашкыны июньнуң ийиги он хонуунда доостур ужурлуг.
Бо хүнде малчыннарның кол сорулгазы – малдың чаш төлүн камгалап арттырары, чайлагларже көжүреринге белеткээри. Мал эмчилери малдың чаш төлүнге тарылгаларны чорудар. Бо чылдан эгелеп шупту мал ажыл-агыйлары малының баш санын, ооң санында малдың чаш төлүн «Хорриот» электроннуг системага демдеглеп, бүрүткедири албан апарган, ол чүгле малдың өң-чүзүн база чизезин эвес, аңаа профилактика, диагностика болгаш эмнелге хемчеглерин чорутканын хандырар.
Тываның Баштыңы кожуун чагыргаларынга чаш малды кадагалап арттырарынга болгаш мал-маганны чайгы турлаглар – чайлагларже көжүрериниң мурнунда тарылга кампаниязын чорударынга бүгү-ле дузаны чедирерин кожуун чагыргаларынга дааскан.
Яамының тускай мергежилдиглериниң сүмелеринге даянып, бүдүрүкчү малдарның аңгы одарларын тургузары-биле кожуун бүрүзүнден эр хураганнарны болгаш анайларны чыырын организастаар болгаш бөлер ажылды муниципалдыг көдээ ажыл-агый эргелелдериниң күжүн ажыглап, шиитпирлээрин айыткан.
