Улуг-Хем кожууннуң аныяк шыырак мөгелериниң бирээзи, Тыва Республиканың Начын мөгези Демир-Хая Самдан бодунуң спортчу чедиишкинин демдеглеп, найырын Шагаан-Арыгга эрттиргенин чагырга чери дыңнаткан.
Шыырак хүрежип чоруур аныяк мөгезин кожууннуң улуг хоочун мөгелери болгаш чону деткип, «Нива» маркалыг автомашинаны белекке Демир-Хаяга сөңнээн турган. Тываның шыырак ча адыгжылары баг адарынга, Арзылаң, Чаан, Начын мөгелер тыва хүрешке мөөрейлешкен.
Бо хүннерде аныяк мөге бодунуң кежиин үлежири-биле суурларже аалдап чедип турар. Хайыракан сумузунда идепкейжи аныяктарның бирээзи, тус черниң школазында одакчылап ажылдап, ийи оглун боду чааскаан азырап чоруур ада Ай-Хаан Биче-Кутка бодунуң өмүнээзинден «изиг-ханны» деткикчилеп, адашкыларга чедирип берген.
Демир-Хая Самдан улаштыр Ийи-Тал сумузунда тускай шериг операциязындан кадыкшылының байдалы-биле халажып келген дайынчыга база ужуражып четкен. Сай-Даш Тюлюш 2023 чылда шериг керээзи езугаар тускай шериг операциязынга киржип тургаш, тулчуушкун үезинде аар балыгланган. Ол боду шимченгир, эрес аажы-чаңныг, Ийи-Тал суурнуң идепкейжи аныяктарының бирээзи, хоккей ойнаарынга, хүрежиринге сундулуг турган. Тываның Начын мөгези тускай шериг операциязының хоочунунга сергени чедирип берген.
Аныяк мөге чаңгыс чер чурттугларынга бодунуң өмүнээзинден деткимче көргүзерин уламчылаарын чугаалаан.