Тываның найысылалында кол фонтаннарның эде чаартылгазы соок дүжерге-даа уламчылаар

Тываның найысылалының төп шөлүн болгаш эрик чоогун каастаан ийи фонтаннар комплекстеринге чаартылга ажылдарын декабрьда доозар кылдыр чылдырган. Россияның Президентизиниң даалгазы-биле аңгылаан акша-хөреңги-биле Кызылдың тураскаалдыг черинде эде чаартылга ажылдары кайы хире чоруп турарын Тываның Баштыңы Владислав Ховалыгның эрттирген ажылчын хуралынга сайгарган.

Декабрьже шилчиткени төнчү шиитпир эвес деп, Тываның тудуг сайыды Артыш Кыргыс дыңнаткан. Ажылды шынарлыг кылыр дээш объектилерниң дужаар хуусаалары элээн соңгаарлаары чадавас. Эге баштай фонтаннарны ноябрьга чедир кылыптар кылдыр планнаанын сагындыраал. Ындыг болзажок, бирээде, акшаландырыышкынның саадааны-биле графикти “аткаар” чылдырган.

Ийиде, баштайгы турганындан фонтаннарга элээн нарын чаа дериг-херекселдерни салып турар. Чижээ, Арат шөлүнде фонтан комплекизиниң өрү актыккан суг агымын чырык база хөгжүм-биле каастап, “ырлаар” кылыптар.

Фонтаннарга дериг-херекселдерни хуу чагыг-биле белеткээн, элээн каш чадалар-биле ону сөөртүп эккээринден 2024 чылдың декабрьда ол доостур. Тудугжулар фонтанның таваан шыварындан аңгыда, насостар, хоорзалар болгаш өске-даа кезектерин эптеп, тударының чаа схемазы-биле тускай ажылдаар.

Технологтуг ажыл-чорудулга үезинде ажылдарны элээн каш чадага чарган. Чижээ, суг эрттирбес каъды биле тиглери быжыг болзун дизе, ооң кадып кургаарын манап, агаарның температуразындан көрүп туда, үш ай чеде бээр.

Ынчалза-даа тудугжулар келир чылче ажылдарны соңгаарладырын планнавайн турар. Бетондан объектилерни долгандыр түр үеде чаглактаныр черни кылгаш, эде тудуушкун ажылдарын чогуур температурада чорудар.

Тывада башкарыкчы тудуг компанияларының бирээзи, 2012 чылдан бээр регионда ажылдап турар «Бастион тускайжыттынган тудуг» кызыгаарлаттынган харыысалгалыг ниитилел фонтаннарны эде тудуп турарын сагындыраал.