Тываның Баштыңы Владислав Ховалыг Кызылда «Түбтен Шедруб Линг» хүрээзиниң чанынга тудар келир үениң аалчылар бажыңының таваан эгелээринге стартты берген.
Россияда аалчылар бажыңы рыногунуң оператору – чурттуң 26 хоорайларын хаара туткан Cosmos Hotel Group четки төлевилелди тудуп, инвесторлаар. 2024 чылда Санкт-Петербургтуң делегей чергелиг экономиктиг шуулганының үезинде Тываның Баштыңы Владислав Ховалыг биле Cosmos Hotel Group компанияның президентизи Александр Бибаның атты салган төлевилелин боттандырар дугуржулга езугаар, тудуг ажылдары эгелээн.
«Тываже кээп турар туристерниң болгаш аалчыларның саны көвүдеп, бистиң республикаже сонуургал улгаткан. Россияда эң улуг буддийжи хүрээни, чуртта эң улуг Будданың тураскаалын, «Азия төвү» скульптура комплекизин, музейивисте скифтер алдынындан кайгамчык экспонаттарны болгаш өске-даа чараш чүүлдерни көөр дээш, дыка хөй кижилер кээп турар. Келир чылын сарыг шажынның IV делегей шуулганы бүгү чурттан болгаш даштыкыдан аалчыларны хаара тудары чадапчок. Аалчыларны бедик деңнелге хүлээп алыр дизе, амгы үениң аалчылар бажыңының комплекстери болгаш шынарлыг инфратургузуг херек» – деп, Владислав Ховалыг бодунуң блогунда тудугнуң эгелээнин дыңнаткан.
«Туризм адырында, ол ышкаш ооң инфратургузуун хандырган төлевилелдерни деткиири» программаның хемчеглерин боттандырары-биле, Күрүнениң саң-хөө деткимчезин бээр хемчеглер порталынга 2025 чылдың март 31-ден апрель 30-ге чедир эрткен мөөрей шилилге езугаар, Кызылда Cosmos Smart аалчылар бажыңының төлевилелин тудар төлевилел шилип алдынган. Тыва Республиканың Күрүнениң туризм комитеди төлевилелди 2025-2030 чылдарда Тываның социал-экономиктиг хөгжүлдезининиң амы-хууда программазының хемчеглерин күрүне-хуу кады эштежилгеге даянып, ооң хөй кезиин хуу инвестиция киирилдези-биле боттандырар дээш, саналдап киирген.
«Cosmos Smart» ылгавыр демдектиг, үш сылдыстыг аалчылар бажыңын Кызылдың мурнуу талазында, «Түбтен Шедруб Линг» сарыг шажын хүрээзиниң чанынга тудар. Ону шажын-чүдүлге объектизин долгандыр, хүрээ-биле дөмейлешкек чаңгыс аян-хевирге кылыр болгаш комплекстиг тудугнуң бир кезээ апаар.
Тываның Баштыңы үш сылдыстыг аалчылар бажыңының комплекизи Кызылдың база бир каасталгазы апаар дээрзинге бүзүрелин илереткен. Владислав Ховалыгның бодалы-биле алырга, төлевилел чаа ажылчын олуттарны тургузуп, республиканың турисчи күчү-шыдалын болгаш аалчылар хүлээп алыр үлетпүрүн моон-даа соңгаар хөгжүдеринге үндезин болур.
