Тываның орук албан черлери ажылдың кышкы күштелдирген чурумунче шилчээн

Тыва Республиканың орук албан черлери кыш дүшкени-биле, ажылдың күштелдирген чурумунче шилчээн. Кожууннарда чагган баштайгы өл хар оруктарны дошталдырып, орук шимчээшкининиң киржикчилеринден онза кичээнгейни негей берген.

Республиканың орук бүдүрүлгелери харны арыглаар дээш хүннүң-не ажылдап турар. 35 санныг тускай техника болгаш орук ажылдакчылары орук ашталгазында хаара туттунган. Тываның орук-транспорт комплекизиниң яамызының дыңнатканы болза, амгы үеде 15 орук организацияларының алдызы оруктарда идепкейлиг ажылдап турар.

Тываның орук албан черлери агаар-бойдустуң байдалын көрүп тургаш республика девискээринге база оон дашкаар, ылаңгыя дүнеки үеде, чоруурундан ойталаарын чурттакчы чонга сүмелеп турар. Сайыт орук шимчээшкининиң дүрүмнерин болгаш айыыл чок чоруктуң хемчеглерин сагыырын чолаачыларга сагындырган: агаар-бойдустуң байдалын көрүп, оожум чоруп, куржанып алырын утпас.

Агаар-бойдустуң байдалын көрүп, бодунуң айыыл чок чоруу дээш сагыш човаары чугула дээрзин Тываның Транспорт яамызы сагындырган. Чолаачылар чайгы дугуйларын кышкы дугуйларже солуур, а чадаг кижилер оваарымчалыг болур, эртер орук чок черден кешпес, айыыл чок чорукту сагыыр. Орук кежип тургаш, чырып турар камгалалдарны ажыглаар, телефон-биле чугаалажырын соксадып, кулактааштарны уштуп алыр.

Тываавтооруктуң дыңнадып турар болза, республика оруктарының шупту участоктарында байдал таарымчалыг, Суг-Аксы – Баян-Тала автооруунда чирилген черлер бар болганындан аңаа чорууру таарымча чок. Ындыг болзажок, ону ояр орук бар, автомашиналар эртип болур.