ТР-ниң Өөредилге яамызы 5-7 класстарга 38 муң санныг төөгү номнарын алган. Тываның Баштыңы Владислав Ховалыгның даалгазы езугаар чаңгыс аайлаан өөредилге чорудуун тургузары-биле чаа өөредилге номнарын саткан.
Россияның Чырыдыышкын яамызы Россия Федерациязының амгы өөредилге стандартының негелделеринге дүүштүр номнарны ажылдап тургускан.
Владислав Ховалыг өөредилге номнары келгенин дыңнадып тура, чаңгыс аай өөредилге номнарын ажыглаары бистиң чуртта өөредилгениң шынарын чедип алырының чугула кезээ апарганын демдеглээн. Федералдыг өөредилге стандарттарының негелделеринге даянгаш, төөгү эртеминге чаа өөредилге номнарын садар дугайында шиитпир хүлээп алдынган.
«Россияның Чырыдыышкын яамызының федералдыг өөредилге стандарттарынга дүүштүр ажылдап кылганы чаарттынган угланыышкын-дур. Оларны республиканың шупту школаларынче хуваар, сентябрьның 1-ден эгелеп уруглар бурунгу делегейниң болгаш Россияның төөгүзүн чаа номнар-биле өөренип эгелээр» – деп, Тываның Баштыңы чугаалаан.
Регионнуң Өөредилге яамызының дыңнадыы-биле алырга, чаа өөредилге номнары Россия төөгүзүнүң кол болуушкуннарын тодаргай көргүзүп, башкыларга методиктиг сүмелер болгаш өөреникчилерниң өөредилге материалын эки шиңгээдип алырынга дузалыг чуруктарны киирген.
Чаа үндүрүлгелер «Төөгү» эртемин башкылаарының шынарын бедидеринге болгаш бистиң чуртувустуң культурлуг-төөгүлүг өнчүзүнүң дугайында школачыларның билиглерин бедидеринге дуза болурун яамы дыңнаткан.
Тываның Баштыңының ооң мурнунда берген даалгазы езугаар, республиканың школаларын улуг класстарның төөгү номнары-биле четчелээн. Ам чаа өөредилге чылында 5-7 класстарның өөреникчилери чаа төөгу номнары-биле өөренир.
Россияның Чырыдыышкын яамызы российжи школаларга шупту эртемнерниң өөредилге номнарын чаңгыс аайлаарын, ону ажыглалче киирер ажылды ийи дугаар чыл чорудуп турар. Бир дугаарында, бистиң чуртувустуң төөгүзүнүң дугайында шуут шын төөгүнү кадагалап, өөреникчилерге дамчыдар сорулга-биле Россияның төөгүзүнге хамаарышкан өөредилге номнарын ажылдап тургускан болгаш ажыглалче киирген.
Россияның чырыдыышкын сайыды Сергей Кравцов чоокку үш чылда Россияның Эртемнер академиязы-биле кады шупту эртемнерге чаңгыс аайлаан күрүнениң өөредилге номнарын ажылдап кылырын дааскан.
