2022 чылдың төнчүзүнден эгелеп, Тываның школаларынга «Күш-ажылга болгаш камгалалга белен бол» деп школачы спортчу лиганың боттандырылгазы эгелээнин ТР-ниң Өөредилге яамызы дыңнаткан.
Ниити билиг албан черлеринде класс шактарын, кичээлдерин, тайылбыр чугааларны, школаларда «Күш-ажылга болгаш камгалалга белен бол» деп күш-культура шылгалдаларын киирериниң дугайында теориялыг кичээлдерни база кижизидилге чорудуунче киирериниң дугайында өөредилге-методиктиг семинарларны эрттирип турар.
Школачы спортчу лигалар муниципалдыг деңнелде юридиктиг эвес хөй-ниити каттыжылгалар хевирлиг кылдыр тургустунуп турар. Февральда уругларның спортунуң хөгжүлдезинге эки өскерилгелерни бээр спорттуң өске хевирлеринге база немелде муниципалдыг школачы спортчу лигаларны тургузар.
Лиганың кол сорулгазы – күш-культура кичээлдеринче болгаш спортче өөреникчилерни хаара тудары, школа спортун нептередири болгаш сайзырадыры, ниити билиг организацияларында өөреникчилер аразынга спортчу болгаш күш-культура хемчеглерин эрттирери база организастаары.
«Күш-ажылга болгаш камгалалга белен бол» деп күш-культура шылгалдаларының алдын, мөңгүн азы хүлер тергиин демдектиг абитуриентилер өөредилге албан черлеринче өөренип киреринде ЕГЭ болгаш ОГЭ шылгалдаларынга немелде баллдарны ап болур.
Студентилер шак ындыг демдектери-биле бедиткен академиктиг стипендияже кордап болур. Башкылар немелде төлевирлерни ап болур. «Күш-ажылга болгаш камгалалга белен бол» деп школачы спортчу лигалар хемчеглери май 30-ге чедир уламчылаар.
