РФ-тиң Өөредилге яамызының сүмелээни езугаар, майның 24-те Тываның өөредилге черлери сөөлгү коңга хүнүн эрттирерин Тываның Баштыңы Владислав Ховалыг социал четкилерде хууда блогунда ооң дугайында дыңнаткан.
Ооң-биле чергелештир май 22-де Кызыл хоорайга школа-биле байырлажыышкынга тураскааткан байырлыг чыскаалдар планнаттынган. Муниципалдыг тургузуг байырлалды дыштаныр хүннерден ажыл хүнүнче шилчидер деп шиитпирлээн.
Тываның Баштыңы доозукчуларга, оларның ада-иелеринге болгаш башкыларынга ол болуушкуннуң ужур-утказын чугаалаан. «Оолдарның амыдыралынга чаа үе эгелээр. Оларны доозукчу шылгалдалар болгаш амыдыралдың угланыышкынын шилиири, дээди өөредилге черлеринче болгаш тускай өөредилге черлеринче кирер шилилде манап турар» – деп, ол демдеглээн.
Владислав Ховалыг харыысалгалыг шупту удуртукчуларга сөөлгү коңга хүнүн организастаар талазы-биле комплекстиг хемчеглерни алыр даалгаларны берген. Муниципалитеттер даргалары чагырга ажылдакчыларының, башкылар база ада-иелерниң дежурныйлаашкынын организастаар, ол ышкаш комендант шагын сагыыр база арага садарын кызыгаарлаар талазы-биле хемчеглерни алырын сагындырган.
Шупту профилактика албан черлери бүрүткелде назы четпээннерни хыналдага алырын күштелдирип база бажыңнарынче барып көөрүн дааскан. Владислав Ховалыг ТР-ниң Иштики херектер яамызының удуртулгазынга сөөлгү коңга хүнүнде хөй-ниити чурумун хандырар дилегни кылган.
Оон аңгыда, сезоннуг онза байдалдар – хемнер, суглар көдүрлүп, саргылар көвүдеп, регионда өртке удур онза чурум чоруп турарын өөренип көргеш, уруглар-биле агаар-бойдусче үнери хоруглуг дээрзин билзе чогуур.
ТР-ниң Өөредилге яамызының дыңнатканы-биле алырга, бо чылын Тывада 10 муң хире школачыларга сөөлгү коңга чаңгыланыр. Ол дээрге 9-ку класстың 7224 доозукчузу, 11 класстың 2585 доозукчузу-дур. Оларның аразында найысылал Кызылдан 2709 тоску классчы база 1146 он бирги классчы бо чылын школаны доозар.
