РФ-тиң Федералдыг болчукчулар палатазының президентизиниң оралакчызы Е.А. Рубинштейн Тываның суд системазының төөгүзүнүң музейин сонуургап көргенин шүүгү чери дыңнаткан.
ТР-ниң Дээди Судунуң кеземче херектериниң талазы-биле суд коллегиязының даргазы Хээлиг Түлүш ажыл-агыйжы ужуражылганы эрттирген. Аңаа ТР-ниң Болчукчулар палатазының президентизи Ш.Р. Мөңге, квалификация комиссиязының даргазы К.Д. Оюн база киришкен.
Экскурсия үезинде аалчылар Тывага суд системазының тургустунуп база хөгжүп келгениниң, республиканың девискээринге кыдат, моол империяларның тергииделиниң үезинде шиидилгениң онзагайының дугайында билип алган. Ол ышкаш төөгүже аттары кирген тыва шүүгүнүң шылгараңгай төлээлери-биле танышкан.
Е.А. Рубинштейн музейни улуг сонуургал-биле көргеш, хүндүлүг аалчылар дептеринде үнелелин арттырган. Ол Дээди Судта болчукчулар өрээлинге чедип, камгалал төлээлеринге регион бүрүзүнде ындыг эки байдалдар тургустунмаанын демдеглеп, оларның суд органнарының аразында кады ажылдажылгазының деңнелин ниитизи-биле бедии-биле үнелээн.
Музейни Тывага суд системазының тургустунганының 90 чылдаанынга тураскааткадып, 2020 чылда ажытканын сагындыраал. Ында Тываның девискээринге кыдат династияларның чагырга үелеринден амгы үеге чедир республиканың суд системазының тургустунуп келгениниң төөгүзүн таныштырган.
Музейниң фондузунда эриидел херекселдери, 1930 чылдарның тыва дылда баштайгы суд актыларының хоолгалары, республиканың хүндүлүг халажылгада шылгараңгай шииткекчилерниң хеви болгаш медальдары, шынзылгалары, кодекстери бар.
