Тываның технология техникумунда биче бүдүрүлге ажыттынган

Чөөн-Хемчик кожууннуң төвү Чадаана хоорайда, Тываның технология техникумунда, алгы-кештен хеп даараар «Алдын удазын» деп цехтиң чаартылгалыг биче бүдүрүлгези ажыттынганын регионнуң Өөредилге яамызы дыңнадып турар.

Байырлыг хемчегге Тываның Өөредилге яамызының төлээлери – сайыттың бирги оралакчызының хүлээлгезин күүседип турар Ольга Якушева, профессионал өөредилге килдизиниң начальниги Олимпия Ондар база Бай-Тайга кожуундан, Кызыл хоорайдан чалаткан аалчылар киришкен.

Ортумак өөредилге чериниң баазазында ажыттынган чаартылгалыг биче бүдүрүлгениң даараныр болгаш алгы-кеш алгы-кеш эттээр, болбаазырадыр цехтеринге сургуулдар хой болгаш анай-хураган кештеринден чең чок хөректээштер, тыва тоннар, бопук идиктер дээш, оон-даа өске хептерни даарап турар.

Тываның технология техникуму 2017 чылдан тура, өөредилгениң көдээ ажыл-агый бөлүүнче кирген. Бо хүнде өөредилге чериниң алгы-кеш эттээр, болбаазырадыр цегинде сургуулдар башкызының удуртулгазы-биле алгыларны чуп, тускай холуксаалыг сугга шыгыдып турар. Даараныр цехтерде сургуулдар анай-хураган кештерин хол-биле ууштап, хеп быжып даараарынга белеткээр. Белен кештерден чараш торгу пөстер-биле тодарлаан улуг-бичии улуска тыва хептерни база өске кылыгларны чагыг езугаар даарап даарап турар.

Техникумнуң директору Инга Санаа келген аалчыларга өөредилге чериниң «амыдырал-чуртталгазы»-биле таныштырып, сургуулдарның кылып бүдүрүп турар кылыгларын бараалгаткан. Сургуулдар кешти тускай станокка база хол-биле канчаар эттээрин база бичии уругларга бопук идиктерни даараарын көргүскен.

– Амгы үениң техникуму – ол дээрге, чүгле ортумак профессионал билиг бээр чер эвес, а регионнуң социал-экономиктиг хөгжүлдезиниң кыйгырыын илередип турар мурнуку шөлчүгеш-тир. Бо чылын он бир бүдүрүлге мастерскаяларын ажыдар – деп, Тываның өөредилге сайыдының оралакчызының хүлээлгезин күүседип турар Ольга Якушева дыңнаткан.

«Өөредилге» национал төлевилели-биле 2024 чылга чедир Тываның сес колледж база техникумнарынга тос аңгы угланыышкынныг 24 мастерскаяны ажылдадыр.