Ай санаашкыны-биле Шагаа эрттирип турар чоннарның онзагай чаңчылдарын, уран чүүлүн хөй ниитиге тарадып, байырлалдың ханы уткалыг езу-чаңчылдарын кадагалап арттырары-биле Моол күрүнениң үндезин телевидениезиниң чыл санында эрттирип турары «Моол чоннуң мендизи» деп дамчыдылгазынга бо чылын беш чурттуң төлээлекчилери киришкенин Тыва үндезин культура төвү дыңнаткан.
Бурятияның, Калмыкияның, Тываның төлээлекчилери, Тибеттиң моолдары, Синьцзян-Уйгур автономнуг округтуң болгаш Иштики Моолдуң аңгы-аңгы черлеринде чурттап чоруур тывалары дамчыдылганың аалчылары болган.
“Улуг Тывадан” Тываның улустуң хөөмейжизи, Тыва үндезин культура төвүнүң ажылдакчызы Андрей Монгуш база киришкен.
Тыва үндезин культура төвү Моол күрүнениң үндезин телевидениезиниң ажылдакчыларынга Тыва үндезин культура төвүнүң мурнундан хөй санныг биче чоннарның культуразын кадагалап, камгалап арттырарынга киирип чоруур үлүг-хуузу дээш четтиргенин илередип турар.
