Тываның Баштыңы Владислав Ховалыг тускай шериг операциязының киржикчилери – маадырларга тураскаал кылырының талазы-биле скульпторлар аразынга чарлаттынган мөөрейни түңнээн дугайында медээни социал четкиде блогунга дыңнаткан.
– Скульпторлар аразынга тускай шериг операциязының киржикчилери – маадырларывыска тураскаал кылыры-биле чарлаттынган мөөрейни түңнедивис. Боттарының чогаадыкчы ажылдарынче бүгү күжүн, чүрээниң ханызындан сагыш-сеткилин үндүрүп киришкен ус-шеверлерге өөрүп четтирдим. Ай безин четпес үе дургузунда олар кайгамчыктыг төлевилелдерни кылдылар, тураскаал база бо күзүн көстүп кээр.
Баштайгы дээрезинде “Чурттаарынга таарымчалыг инфратургузуу” национал төлевилелдиң «Таарымчалыг хоорай хүрээлеңин тургузары» деп күрүне программазы-биле тураскаалды кылыр арга тыптып келген. Эрткен чылын найысылалдың чурттакчылары Улуг-Хем кыдыын чаагайжыдарынга хамаарышкан объектилер аразындан ол төлевилелди шилип бадылаан.
Ам бо хүнде чамдык чүүлдерни тодаргайлап чугаалап болур. Бистиң алдарлыг чаңгыс чер чурттуувус, Россияның Маадыры Сергей Күжүгетович Шойгу ол тураскаалды улгатырар дугайында санал киирген. Ынчангаш чаңгыс дайынчыны көргүскен тураскаалдың орнунга улуг тураскаал ансамбли турар. Ону кылырынга Күжүгет Шойгу аттыг Культура фондузу акша-хөреңгини үндүрүп, деткимчени көргүзер болган. Бедик профессионал деңнелдиг жюри – алдар-аттыг скульпторлар, Тываның кол архитектору болгаш тудуг сайыды – мөөрейге киириштирген ажылдарны бедии-биле үнелээн. Түңнелинде, бистиң улусчу ус-шеверивис Байза Ондарның төлевилели тиилекчи болган. Ооң ажылы эң-не аянныг, сагыш-сеткил хайныышкынныг деп үнелелди алган.
Бо тураскаал Тываның амгы үениң скульптура уран чүүлүнүң көскү үлегер-чижээ болуп, Улуг-Хемниң эгезин алган чериниң эриинге, чок болган маадырларның адын мөңгежидип бижээн самбыралар чанынга, төлептиг черни ээлээр дээрзинге бүзүрээр мен.
