Сүт-Хөл кожууннуң хүрээзинге Будда Шакьямуни бурганның овур-хевирин чаларатканын чагырга чери дыңнаткан.
Тываның Улустуң ус-шевери, сураглыг скульптор Байза Ондар Будда бурганның овур-хевирин Москва хоорайга чартык чыл дургузунда кылгаш, эккелген.
Ондарларның төрел аймаа Будда Шакьямуни бурганның овур-хевирин кожууннуң хүрээзинге белек кылдыр өргээнинге сүт-хөлчүлер аажок өөрүп, четтиргенин илереткен.
Кызыл хоорайның Цеченлинг хурээзинге лама башкылар бурганның овур-хевирин ыдыктап, диргизер езулалды кылган.
Сүт-Хөл чонунуң бир чаагай чанчылы – дөргүл-төрел демнежип тургаш, өскен-төрээн черинге бир-ле ажыктыг чүүлдү кылыры.
Ус-шевер скульпторларның бирээзиниң ажылдары (Тыва Арат Республиканың Чазааның баштайгы даргазы Моңгуш Буян-Бадыргының, Тыва Арат Республика күрүнени тургузарынга кончуг шудургузу-биле киришкен Иннокентий Сафьяновтуң, РСФСР-ниң улустуң артизи, сураглыг Максим Мунзуктуң, делегейде ады-сураа алгаан чурукчу кыс Надя Рушеваның, Кадарчы дээш өске-даа) найысылалывысты каастап турар.
